काठमाडौं (हाम्रो खेलकुद) – अन्तर्राष्ट्रिय क्रिकेट परिषद् (आइसिसी) ले थाईल्यान्ड सहित पाँच एसोसियट देशलाई महिला ओडिआई मान्यता प्राप्त प्रदान गरेको छ । आइसिसीले बुधबार थाईल्यान्डसँगै, अमेरिका, नेदरल्यान्ड्स, पपुवा न्युगिनी र स्कटल्यान्डलाई महिला ओडिआई मान्यता प्रदान गरेको छ।
थाईल्यान्ड बाहेक अन्य चार टोलीका पुरुष टोली ओडिआई मान्यता देश हुन् । थाईल्यान्ड महिला टि२० आई वरियतामा १० औं स्थानमा छ । महिला टि२० आई वरियतातर्फ स्कटल्यान्ड १३ औं, पपुवा न्युगिनी १४ औं, नेदरल्यान्ड्स २० औं र अमेरिका २७ औं स्थानमा छन् । नेपाल १६ औं स्थानमा छ । नेपाल भन्दा वरियतामा पछि रहेका दुई देश अमेरिका र नेदरल्यान्ड्सले महिला ओडिआई मान्यता पाएका हुन् ।
आइसिसीले आइसिसी वुमन्स च्याम्पियनसिप सार्वजनिक गरेको छ । वुमन्स च्याम्पियनसिपमा टेस्ट टोली जिम्बावे र अफगानिस्तान बाहेक अन्य १० टोली सहभागी हुनेछन् । बंगलादेश र आयरल्यान्ड्सले यस च्याम्पियनसिपमा पहिलो पटक सहभागीता जनाउनेछन् । जुन २०२५ मा हुने महिला विश्वकप छनोटको बाटो हुनेछ ।
१० टोलीले तीन खेलको आठ सिरिज खेल्नेछन् । चार होम र चार अवेमा हुनेछन् । जसमा आयोजक बाहेक पाँच टोली सोझैं विश्वकपमा पुग्नेछन् । बाँकी दुई टोली विश्वकप छनोटबाट आउनेछन् । दुई टोली ओडिआई वरियतामा निर्भर रहनेछ । २०२५ देखि महिला विश्वकपमा १० टोलीले सहभगीता जनाउने छन् । यसअघि भने आठ टोलीले विश्वकपमा सहभागीता जनाउँदै आएका छन् ।
