एजेन्सी – राजस्थान रोयल्सलाई इन्डियन प्रिमियर लिग (आइपिएल) मा १४ वर्षपछि च्याम्पियन बन्ने अवसर रहेको छ । राजस्थानले आज फाइनलमा साँझ गुजरात टाइटन्ससँग प्रतिस्पर्धा गर्दै छ । खेल विश्वको सर्वाधिक ठूलो क्रिकेट मैदान नरेन्द्र मोदी स्टेडियम अहमदाबादमा साँझ ८ : १५ बाट सुरु हुनेछ ।

राजस्थानले सन् २००८ मा भएको पहिलो संस्करणको उपाधि जितेको थियो । फाइनलमा चेन्नई सुपर किंग्सलाई ३ विकेटले पराजित गर्दै उपाधि जितेको थियो । त्यसपछि भने राजस्थानले फाइनलमा सम्म स्थान बनाउन सकेको थिएन । फाइनलमा विजयी भएमा राजस्थान १४ वर्षपछि च्याम्पियन बन्नेछ ।

राजस्थानले २०१३ मा तेस्रो स्थानमा रहँदै एलिमिनेटर खेलमा सनराइजर्स हैदराबादलाई ४ विकेटले पराजित गर्दै दोस्रो क्वालिफायरमा पुगेको थियो । क्वालिफायरमा मुम्बई इन्डियन्ससँग ४ विकेटले पराजित हुँदै बाहिरिएको थियो । मुम्बईले फाइनलमा चेन्नईलाई हराउँदै आइपिएलको पहिलो उपाधि जितेको थियो ।

त्यसपछि राजस्थान २०१५ र २०१८ मा एलिमिनेटरबाट बाहिरिएको थियो । २०१५ मा राजस्थान बेंगलोरसँग ७१ रनले पराजित हुँदै बाहिरिएको थियो । २०१८ को एलिमिनेटर खेलमा कोलकातासँग २५ रनले पराजित हुँदै बाहिरिएको थियो । अन्य सिजनमा भने राजस्थान लिगबाटै बाहिरिदै आएको थियो ।

गुजरातले पहिलो क्वालिफायरमा राजस्थानलाई ७ विकेटले हराउँदै फाइनलमा स्थान बनाएको थियो । राजस्थानले दोस्रो क्वालिफायरमा रोयल च्यालेन्जर्स बेंगलोरलाई ७ विकेटले हराउँदै फाइनलमा पुगेको थियो । यस सिजनमा राजस्थान र गुजरातबीच दुई खेल भएका छन् । दुबै खेलमा गुजरात विजयी भएको छ ।

राजस्थानलाई च्याम्पियन बनाउन ओपनर जस बटलरको प्रदर्शन निकै महत्वपूर्ण हुनेछ । बटलरले यस सिजनमा चार शतकसहित ८ सय २४ रन बनाई सकेका छन् । बटलरले दोस्रो क्वालिफायरमा बेंगलोरविरुद्ध १ सय ६ रनको शतकीय इनिङ खेलेका थिए । गुजरातविरुद्ध पहिलो क्वालिफायरमा ८९ रन जोडेका थिए ।

सुरुवाती केहि समय लिँदै अन्तिम सम्म ब्याटिङ गर्ने बटलरको प्रदर्शनले योगफल निर्भर रहनेछ । राजस्थानको तल्लोक्रम ब्याटिङ कमजोरीको रुपमा छ । त्यसको लागि मध्यक्रमका ब्याटर देवदत्त पाडिक्कल र शिम्रन हेटमायरले राम्रो ब्याटिङ गर्नुपर्छ ।

राजस्थानको यस सिजनमा उत्कृष्ट बलिङ आक्रामण छ । तीव्र गतिका बलर ट्रेन्ट बोल्ट, ओबेद म्याकोय र प्रसिद्ध कृष्ण छन् । कृष्ण र म्याकोयले दोस्रो क्वालिफायरमा उच्च प्रदर्शन गर्दै आएका छन् । बोल्टले नयाँ बलका साथ सानदार प्रदर्शन गर्दै आएका छन् । स्पिनर युजभेन्द्र चहल र रविचन्द्रन आश्विनको जोडीको प्रदर्शन अझैं महत्वपूर्ण हुनेछ ।

चहललाई पर्पल क्याप जित्न आजको खेलमा कम्तिमा एक विकेट लिनुपर्छ । बेंगलोरका हर्षल पटेल र चहलको समान २६ विकेट छ । बटलरको लय र राजस्थानको बलिङ आक्रामणनै प्रमुख पक्षको रुपमा छ । राजस्थानको टोलीमा परिवर्तनको सम्भावना भने कम छ ।