ह्युस्टन, अमेरिका (हाम्रो खेलकुद) – पूर्व न्युजिल्यान्डका विष्फोटक ब्याटिङ अलराउन्डर कोरी एन्डरसनले आज राती हुने नेपालसँगको अभ्यास खेल नेपाली अल स्टार्सबाट नखेल्ने भएका छन् । यसअघि एन्डरसन नेपाली अल स्टार्सको उपकप्तानको रुपमा टोलीमा रहेपनि पारिवारिक कारण गुमाउने भएका छन् ।

खेल नेपाली समय अनुसार राती ९ : १५ मा अमेरिकाको ह्युस्टनमा रहेको पेरिरी भ्यू क्रिकेट मैदानमा खेल सुरु हुनेछ । खेल ५० ओभरको अभ्यास हुनेछ । एन्डरसनको छोरी जन्मिएपछि नखेल्ने भएका हुन् । छोरीको जन्म भएसँगै उनी अमेरिकाको डलास फर्किएका छन् ।

कोरी नेपालविरुद्ध खेल्ने नेपाली अल स्टार्सबाट सर्वाधिक ठूला नाम रहेका खेलाडी थिए । पृथु बाँस्कोटाको कप्तानीमा रहेको अल स्टार्समा वसन्त रेग्मी, कनिष्क चौगाईं, आइपिएल अनुभवी विपुल शर्मा लगायतका खेलाडी छन् । एन्डरसनले न्युजिल्यान्ड छाडेर अमेरिकाबाट क्रिकेट खेल्ने तयारीमा रहेका छन् । कोरीले २०१८ यता न्युजिल्यान्डबाट खेलेका छैनन् ।

बाँया हाते कोरी विश्फोटक ब्याटिङकासँगै तीब्र गतिका बलर हुन् । ३१ वर्षीय उनले न्युजिल्यान्डका लागि ४५ ओडीआई इनिङमा १ शतक र ४ अर्ध शतक सहित कुल ११ सय ९ रन बनाएका छन् । एन्डरसनले सन् २०१४ मा वेस्ट इन्डिविरुद्ध ३६ बलमै शतक प्रहार गरेका थिए ।

उक्त खेलमा एन्डरसन ४७ बलमा ६ चौका र १४ छक्का सहित १ सय ३१ रनको विश्फोटक इनिङ खेलेका थिए । २४ टि ट्वान्टी आई इनिङमा एन्डरसनले ४ सय ८५ रन बनाएका छन् । टि ट्वान्टी आईमा बंगलादेशविरुद्ध २०१७ मा ४१ बलमा १० छक्का र २ चौका सहित ९४ रनमा अविजित इनिङ खेलेका थिए । एन्डरसनले टेष्टमा १६, ओडीआईमा ६० र टि ट्वान्टीमा १४ विकेट लिएका छन् ।