ह्युस्टन, अमेरिका (हाम्रो खेलकुद) – नेपालले दोस्रो एकदिवसिय अभ्यास खेलमा ह्युस्टन हरिकेन्सविरुद्ध पहिला ब्याटिङ गर्ने भएको छ । पे्रर क्रिकेट भ्यू कम्प्लेक्समा भएको टसमा हरिकेन्सले जितेर पहिला फिल्डिङ गर्ने निर्णय लिएको हो ।

नेपालले आजको खेलमा कप्तान सन्दीप लामिछानेलाई विश्राम दिएको छ । उपकप्तान रोहित पौडेलले आजको खेलमा नेपालको कप्तानी गर्दैछन् । नेपालले आजको खेलमा सन्दीपसँगै आसिफ शेख, किशोर महतो र आदिल अन्सारीलाई विश्राम दिएको छ । दीपेन्द्रसिंह ऐरी भने टोलीमा फर्किएका छन् ।

नेपाल पहिलो अभ्यास खेलमा नेपाली अल स्टार्ससँग ४ विकेटले पराजित भएको थियो । नेपालका कप्तान सन्दीप लामिछानेले पाँच विकेट लिएपनि खेल जिताउन सकेका थिएनन् । नेपाल दोस्रो अभ्यास खेलमा सानदार जितका साथ उच्च मनोबलका साथ अमेरिका र ओमानसँग खेल्ने सोचमा हुनेछ ।

हरिकेन्ससँगको अभ्याससँगै नेपालको आइसिसी विश्वकप लिग–२ अन्तर्गत अमेरिका र ओमानसँगको त्रिकोणात्मक ओडिआई सिरिजको तयारी सकिनेछ । नेपालले पहिलो खेल जेठ २६ मा ओमानसँग खेल्दै सुरुवात गर्नेछ । खेल अमेरिकाको ह्युस्टनस्थित मुसा क्रिकेट स्टेडियमा हुनेछ ।

नेपालको प्लेइङ ११ : देव खनाल, दीपेन्द्रसिंह ऐरी, रोहित पौडेल (कप्तान), आरिफ शेख, विनोद भण्डारी, करण केसी, सोमपाल कामी, कुशल भुर्तेल, सागर ढकाल, सुनिल धमला र सुशान भारी ।