ह्युस्टन, अमेरिका (हाम्रो खेलकुद) – नेपालले दोस्रो एकदिवसिय अभ्यास खेलमा ह्युस्टन हरिकेन्सविरुद्ध ब्याटिङमा कमजोर सुरुवात गरेको छ । प्रेर क्रिकेट भ्यू कम्प्लेक्समा टसमा हारेर ब्याटिङको निम्तो पाएको नेपालले ११ ओभरमा ३ विकेट गुमाउँदै ५५ रन बनाएको छ ।

नेपालका कप्तान रोहित पौडेल ४ र दीपेन्द्रसिंह ऐरी ११ रनमा अविजित छन् । दीपेन्द्रले ८ बलमा १ चौका र १ छक्का प्रहार गरेका छन् । नेपाली अल स्टार्ससँग रोयल डक आउट भएका ओपनर कुशल भर्तुेल हरिकेन्सविरुद्ध ८ बल खेल्दै १ रनमा क्याच भए । कुशल तीव्र गतिका बलर हसन राशिदको दोस्रो ओभरको चौथो बलमा रमिज राजा जेआरबाट क्याच भए ।

दोस्रो विकेटका लागि देव खनाल र सुनिल धमलाले ३४ रनको साझेदारी गरे । धमला मोहम्मद इलायसको नवौं ओभरको तेस्रो बलमा धमला एज लागेर विकेटकिपर उस्मान राफिकबाट क्याच भए । धमलाले १६ बलमा १ चौकासहित १३ रन जोडे ।

यसै ओभरको अन्तिम बलमा कभर डाइभ सट खेल्न खोजेका देव खनाल फस्ट स्लिपमा राजाबाट १९ रनमा क्याच भए । ३१ बल खेलेका देवले ४ चौका प्रहार गरे । आजको खेलमा रोहित पौडेलले कप्तानी गरेका छन् । सन्दीप लामिछानेलाई नेपालले विश्राम दिएको छ ।

नेपालको प्लेइङ ११ :

देव खनाल, दीपेन्द्रसिंह ऐरी, रोहित पौडेल (कप्तान), आरिफ शेख, विनोद भण्डारी, करण केसी, सोमपाल कामी, कुशल भुर्तेल, सागर ढकाल, सुनिल धमला र सुशान भारी ।