एजेन्सी – तीव्र गतिका बलर जोश हेजलवुडको घातक बलिङको सहयोगमा घरेलु टोली श्रीलंकाले पहिलो टि२० आई खेलमा अष्ट्रेलियालाई १ सय २९ रनको सामान्य लक्ष्य दिएको छ ।

प्रेमदासा स्टेडियम बोलम्बोमा टस हारेर पहिला ब्याटिङको निम्तो पाएको श्रीलंका १९.३ ओभरमा १ सय २८ रनमा अल आउट भयो । एक समय १००-१ को बलियो अवस्थामा रहेको श्रीलंकाले नाटकीय रुपमा विकेट गुमाउँदै सस्तैमा अल आउट भएको हो ।

श्रीलंका चरिथ असालंकाले ३४ बलमा ३ चौका र १ छक्कासहित सर्वाधिक ३८ रन बनाए । ओपनर पाथुम निसंका ३१ बलमा २ चौका र १ छक्कासहित ३६ रनमा आउट भए । ओपनर धनुष्का गुणथिलका १५ बलमा ३ चौका र १ छक्कासहित २६ रनम क्याच आउट भए । गुणथिलका हेजलवुुडको पाँचौं ओभरको दोस्रो बलमा ठूलो सट खेल्ने धुनमा डिप प्वाइन्टमा मिचेल मार्शबाट क्याच भए ।

दोस्रो विकेटका लागि पाथुम र चरिथले ६१ रनको साझेदारी गरेका थिए । एक समय श्रीलंका ११.४ ओभरमा १००–१ को बलियो अवस्थामा थियो । १२ औं ओभरको अन्तिम बलमा मिचेल स्टार्कले योर्करमा पाथुमलाई बोल्ड गर्दा १००–२ को अवस्थामा पुगेको थियो ।

१४ औं ओभरमा हेजलवुडले एक रन खर्चेर तीन विकेट लिएपछि श्रीलंका संकटमा परेको थियो । पहिलो बलमा कुशल मेन्डिस टप एज लागेर एश्टन अगरबाट एक रनमा क्याच भए । चौथो बलमा भानुका राजपक्ष कटबिहाइन्ड हुँदै गोल्डेक डक आउट भए । इन्डियन प्रिमियर लिग (आइपिएल) मा पन्जाब किंग्सबाट आक्रामक ब्याटरमा प्रभाव छाडेका राजपक्षे आउट भएपछि श्रीलंका पुरै दबाबमा परेको थियो ।

अन्तिम बलमा कप्तान दासुन शनका एलबीडब्लू आउट भएपछि श्रीलंका १०३–५ को कमजोर अवस्थामा पुगेको थियो । दुई रन जोड्न प्रमुख चार विकेट गुमाएपछि श्रीलंका सामान्य योगफलमै समेटिएको हो । वानिन्दु हसरंगाले १५ बलमा २ चौकासहित १७ रन बनाए । राम्रो सुरुवातको बाबजुद श्रीलंका ७ खेलाडीले दोहोरो अंकमा रन छुन सकेनन् ।

अष्ट्रेलिया जोश हेजलवुडले ४ ओभरमा १६ रन खर्चेर ४ विकेट लिए । मिचेल स्टार्कले ४ ओभरमा २६ रन खर्चेर ३ विकेट लिए । केन रिचर्ड्सनको नाममा १ विकेट रह्यो ।