एजेन्सी – अष्ट्रेलियाले दोस्रो टि२० आई खेलमा घरेलु टोली श्रीलंकामाथि तीन विकेटको संघर्षपूर्ण जित हात पारेको छ । योसँगै तीन टि२० आई खेलको सिरिज भ्रमण टोली अष्ट्रेलियाले एक खेल अगावै २–० ले जितेको छ ।

जितको लागि १ सय २५ रनको विजयी लक्ष्य पछ्याएको अष्ट्रेलियाले १७.५ ओभरमा ७ विकेट गुमाउँदै पूरा गर्यो । अष्ट्रेलियाको जितमा म्याथ्यु वेडले २६ बलमा २ चौकासहित २६ रन बनाउँदै प्लेयर अफ द म्याच चुनिए । कप्तान आरोन फिन्च १३ बलमा ४ चौकासहित २४ रनमा आउट भए ।

डेविड वार्नर २१, मिचेल मार्श ११, स्टिभ स्मिथ ५, ग्लेन म्याक्सवेल १९, मार्कस स्टोइनिस ९ रनमा आउट भए । एक समय ९९–७ को अवस्थामा पुगेको अष्ट्रेलियालाई आठौं विकेटका लागि वेड र झेय रिचर्ड्सनले २७ रनको अविजित साझेदारी गर्दै जित दिलाएका थिए । झेय रिचर्ड्सन २० बलमा ९ रनमा अविजित रहे ।

श्रीलंका लेग स्पिनर वानिन्दु हसरंगाले ४ ओभरमा ३३ रन खर्चेर ४ विकेट लिए । दुश्मन्था चामिरा र नुवान थुशराले १–१ विकेट लिए ।

त्यसअघि आर प्रमदासा कोलोम्बोमा टस हारेर ब्याटिङ थालेको श्रीलंकाले निर्धारित २० ओभरमा ९ विकेट गुमाउँदै १ सय २४ रन बनाएको थियो । श्रीलंकाको चरिथ असलंकाले ३३ बलमा २ चौका र २ छक्कासहित सर्वाधिक ३९ रन बनाए । कुशल मेन्डिस ३६ बलमा २ चौका र १ छक्कासहित ३६ रनमा आउट भए ।

कमजोर सुरुवात गरेपनि तेस्रो विकेटका लागि असलंका र मेन्डिसले ६६ रनको साझेदारी गर्दै प्रतिस्पर्धात्मक योगफलको सम्भावना देखाएका थिए । असलंका आउट हुँदा ११.५ ओभरमा ७३–३ को अवस्थामा रहेको श्रीलंकाले त्यसपछि लगातार विकेट गुमाएको थियो । भानुका राजपक्षे १३, दासुन शनका १४ र वानिन्दु हसरंगा १२ रनमा आउट भए ।

अष्ट्रेलिया केन रिचर्ड्सनले ४ ओभरमा ३० रन खर्चेर ४ विकेट लिए । झेय रिचर्ड्सनले ४ ओभरमा २६ रन खर्चेर ३ विकेट लिए । ग्लेन म्याक्सवेलले ३ ओभरमा १८ रन खर्चेर २ विकेट लिए । पहिलो खेलमा अष्ट्रेलिया १० विकेटले विजयी भएको थियो । तेस्रो तथा अन्तिम खेल शुक्रबार हुनेछ ।