एजेन्सी – विल ज्याक्सको विष्फोटक शतकीय इनिङको मद्दतमा इंडियन प्रिमियर लिग अन्तर्गत आईतबार भएको पहिलो खेलमा रोयल च्यालेनजर्स बेंगलूरु (आरसिबि) ले सानदार जित दर्ता गरेको छ । आरसिबिले गुजरात टाईटन्स माथि ९ विकेटको फराकिलो जित दर्ता गरेको हो ।

गुजरातले दिएको २०१ रनको विशाल लक्ष्य आरसिबिले १६ ओभरमै १ विकेट मात्र गुमाएर भेटायो । आरसिबिका लागि ज्याक्सले ४१ बलमा ५ चौका र १० छक्का प्रहार गर्दै १०० रन पुर्याए ।

यस्तै विराट कोहलीले ४४ बलमा ६ चौका र ३ छक्का सहित ७० रन जोडे । कप्तान फ्याफ डु प्लेसिसले २५ रन बनाए ।

गुजरातका लागि एकमात्र विकेट साई किशोरले लिए ।

त्यसपछि अहमदाबादमा टस हारेर ब्याटिङ गरेको गुजरातले २० ओभरमा ३ विकेटको क्षतिमा २०० रन बनायो । गुजरातका लागि साई सुदर्शनले ४९ बलमा ८ चौका र ४ छक्का सहित सर्वाधिक ८४ रन बनाए । शाहरुख खानले ३० बलमा ५८ रन बनाए भने डेभिड मिलरले २६ रन बनाए । शुभमन गीलले १६ रन जोडे ।

आरसिबिका लागि स्वप्निल सिंह, मोहम्मद सिराज र ग्लेन म्याक्सवेलले १-१ विकेट लिए ।

जित पछि आरसिबि १० खेलमा ६ अंक सहित पुछारमा यथावत छ । गुजरात भने १० खेलमा ८ अंक सहित सातौं छ ।

आईपिएलमा आज हुने दोस्रो खेलमा चेन्नाई सुपर किङ्स र सनराईजर्स हैदराबाद भिड्ने छन् ।