एजेन्सी – नेपाललाई ८ रनमा अल आउट गरेको युएई आगमी वर्ष दक्षिण अफ्रिकामा पहिलो पटक हुने यू–१९ महिला टि२० विश्वकपको लागि छनोट भएको छ । मलेसियामा जारी आइसिसी यू–१९ महिला टि२० विश्वकप एसिया क्षेत्र छनोटमा युएईले अन्तिम खेलमा थाईल्यान्डलाई ६ विकेटले हराउँदै अपराजित रहँदै विश्वकपमा पुगेको हो ।

जितको लागि ८५ रनको मध्यम विजयी लक्ष्य पछ्याएको युएईले १७.१ ओभरमा ४ विकेट गुमाउँदै पूरा गर्यो । युएईकी कप्तान थ्रीर्थ सतिश ३८ बलमा ४ चौकासहित ३८ रनमा अविजित रहिन् ।

त्यसअघि किनरारा ओभलमा टस जितेर पहिला ब्याटिङ थालेको थाईल्यान्डले निर्धारित २० ओभरमा ८ विकेट गुमाउँदै ८४ रन बनाएको थियो । थाईल्यान्डकी फनिता मायाले ३९ बलमा ६ चौका सहित सर्वाधिक ४० रन बनाइन् ।

६ टोली सहभागी प्रतियोगितामा शीर्ष स्थानमा रहने टोलीले आगमी वर्ष पहिलो पटक हुने यू–१९ महिला विश्वकप खेल्न पाउने प्रावधान थियो । युएई ५ खेलमा शतप्रतिशत जितका साथ शीर्षस्थानमा रहँदै विश्वकपमा पुग्यो ।

युएईले भुटानलाई १ सय ६० रन, नेपाललाई १० विकेट, मलेसियालाई ९ विकेट र कतारलाई १० विकेटले हराएको थियो । नेपाललाई १० विकेटले हराउने क्रममा युएईले मात्र ८ रनमा अल आउट गरेको थियो ।

नेपाल भने ५ खेलमा ३ मा जित र २ मा हारका साथ बाहिरियो । नेपाल थाईल्यान्डसँग ४९ रनले पराजित हुँदा कतारलाई ७९ रन, भुटानलाई ४ विकेट र मलेसियालाई २५ रनले हराएको थियो ।