ह्युस्टन, अमेरिका (हाम्रो खेलकुद) – नेपालले आइसिसी विश्वकप लिग २ त्रिकोणात्मक ओडिआई सिरिज अन्तर्गत ओमानले प्रस्तुत गरेको मध्यम विजयी लक्ष्य पछ्याउने क्रममा कमजोर प्रदर्शन गरेको छ ।

जितको लागि २ सय १२ रनको लक्ष्य पछ्याएको नेपालले २६ ओभरमा ४ विकेट गुमाउँदै ९६ रन बनाएको छ । नेपालका दीपेन्द्रसिंह ऐरी १३ र आरिफ शेख ९ रनमा अविजित छन् ।

तीव्र गतिका बलर बिलाल खानले तेस्रो ओभरको दोस्रो बलमा ओपनर सुवास खकुरेललाई ३ रनमा बोल्ड आउट गरे । ३८ बल खेल्दै अर्का ओपनर सुनिल धमला जिशान मकसुदको बलमा १२ रनमा बोल्ड भए ।

उपकप्तान तथा प्रमुख ब्याटर रोहित पौडेल जिशान मकसुदको १९ औं ओभरको पहिलो बलमा खवर अलीबाट २० रनमा क्याच हुन पुगेपछि नेपाल ७१–३ को अवस्थामा पुगेको थियो । रोहितले १७ बलमा ३ चौका प्रहार गरे । युवा ब्याटर देव खनाललाई खवर अलीले ३४ रनमा बोल्ड आउट गरे । देवले ५३ बलमा ५ चौका प्रहार गरे ।

त्यसअघि ह्युस्टनस्थित मुसा क्रिकेट स्टेडियममा टस जितेर पहिला ब्याटिङ रोजेको ओमानले निर्धारित ५० ओभरमा ८ विकेट गुमाउँदै २ सय ११ रन बनाएको थियो । ओमानका कप्तान जिशान मकसुद १ सय २६ बलमा १२ चौकासहित १ सय ४ रनको अविजित शतकीय इनिङ खेले ।

नेपालका करण केसीले पाँच विकेट लिए । उनी ओडिआईमा पाँच विकेट लिने सोमपाल कामी र सन्दीप लामिछानेपछि तेस्रो खेलाडी हुन् । करण नेपालबाट ओडिआई र टि२० आई दुबैमा पाँच विकेट लिने पहिलो बलर बनेका छन् । नेपालका करण केसीले १० ओभरमा ३८ रन खर्चेर ५ विकेट लिए ।