ह्युस्टन (हाम्रो खेलकुद)– आइसिसी विश्वकप लिग–२ त्रिकोणात्मक ओडिआई सिरिजमा ओमानले नेपालविरुद्ध टस जितेर पहिला ब्याटिङ गर्ने भएको छ । मुसा क्रिकेट स्टेडियममा ओमानका कप्तान जिशान मकसुदले टस जितेर पहिला ब्याटिङ गर्ने निर्णय लिएका हुन् । नेपालले आजको खेलमा टोलीमा एक परिवर्तन गरेको छ ।

स्पिनर सुशान भारीको स्थानमा सागर ढकाललाई मौका दिएको छ । ओमान आइसिसी विश्वकप लिग–२ मा आफ्नो सम्पूर्ण ३६ खेल पुरा गर्ने पहिलो टोली बन्नेछ । ओमान आफ्नो अन्तिम खेल जितका साथ अन्त्य गर्न चाहन्छ । अमेरिका भ्रमणमा नेपाल पहिलो जित निकाल्ने सोचमा छ । नेपाल पहिलो खेलमा ओमानसँग १३ रनले पराजित हुँदा अमेरिकासँगको खेल टाई भएको थियो ।

ओमान पहिलो खेलमा अमेरिकासँग १ सय १४ रनले पराजित हुँदा दोस्रो खेलमा अमेरिकालाई १३ रनले हराएको थियो । नेपाली ब्याटरलाई आजको खेलमा सुरुवातपछि ठूलो इनिङको आवश्यक देखिन्छ । उत्कृष्ट अन्त्य र उत्कृष्ट बलिङ गर्न आवश्यक छ । देव खनाल, दीपेन्द्र सिंह ऐरी र रोहित कुमार पौडेलको प्रदर्शन नेपाललाई महत्वपूर्ण हुनेछ ।

नेपालको प्लेइङ ११ :

आसिफ शेख, कुशल भुर्तेल, देव खनाल, रोहित पौडेल, दीपेन्द्रसिंह ऐरी, आरिफ शेख, आदिल अन्सारी, करण केसी, सोमपाल कामी, सागर ढकाल र सन्दीप लामिछाने (कप्तान) ।

हेड टु हेड :

नेपाल र ओमानबीच पाँच ओडिआई खेल भएको छ । ओमान चार र नेपाल एक खेलमा विजयी भएका छन् ।