एजेन्सी – अष्ट्रलिया श्रीलंकासँगको दोस्रो ओडिआई खेलमा डकवर्थ लेविस पद्धतिको आधारमा २६ रनले स्तब्ध भएको छ । योसँगै घरेलु टोली श्रीलंकाले पाँच ओडिआई खेलको सिरिज १-१ को बराबरीमा पुर्याएको छ ।

जितको लागि २ सय १६ रनको विजयी लक्ष्य पछ्याएको अष्ट्रेलिया ३७.१ ओभरमा १ सय ८९ रनमा अल आउट भयो । अष्ट्रेलिया ओपनर डेविड वार्नरले ५१ बलमा ५ चौकासहित सर्वाधिक ३७ रन बनाए । अर्का ओपनर फिन्च १४ रनमा आउट भए । दुबै ओपनर स्पिनर धनन्जय डि सिल्भाको बलमा आउट भएका थिए ।

स्टिभ स्मिथ २८, ट्रविस हेड २३, मार्नस लाबुसेन १८ र एलेक्स केरी १५ रनमा आउट भए । ग्लेन म्याक्सवेल २५ बलमा ५ चौकासहित ३० रनमा आउट भए । श्रीलंकाका चामिका करुणारत्नेले ७ ओभरमा ४७ रन खर्चेर ३ विकेट लिए। दुश्मन्था चामिरा, धनन्जय डि सिल्भा र दुनिथ वेलालगेले २–२ विकेट लिए ।

त्यसअघि पल्लेकेले इन्टरनेशनल क्रिकेट स्टेडियममा टस हारेर पहिला ब्याटिङ थालेको घरेलु टोली श्रीलंकाले ४७.४ ओभरमा ९ विकेट गुमाउँदै २ सय २० रन बनाएको थियो । श्रीलंका विकेटकिपर कुशल मेन्डिसले ४१ बलमा २ चौका र १ छक्कासहित सर्वाधिक ३६ रन बनाए ।

धनन्जय डि सिल्भा र कप्तान दसुन शनकाले ३४–३४ रनको योगदान दिए । ओपनर धनुष्का गुणाथिलका १८, पाथुम निसंका १४, चरिथ असलंका १३, चामिका करुणारत्ने १८ र दुनिथले २० रनको योगदान दिए ।

अष्ट्रेलिया प्याट कमिन्सले ८.४ ओभरमा ३५ रन खर्चेर ४ विकेट लिए । ग्लेन म्याक्सवेल र म्याथ्यु कुहनेमानले २–२ विकेट लिए । तेस्रो खेल आइतबार हुनेछ ।