भुपेन्द्र जिसी, काठमाडौं

एसिया कपमा छनोट हुने लक्ष्यसहित मलेसिया पुगेको नेपाली टोलीका लागि शुक्रबार बिर्सनलायक दिन रहयो । एसीसी महिला टि२० च्याम्पियनसिपको सेमिफाइनलमा यूएईविरुद्ध सानदार प्रदर्शन गरेपनि वर्षा बाधक बन्दा नेपाल फाइनल पुग्नबाट चुक्यो । यूएईविरुद्ध तीव्र गतिकी बलर अस्मिना कर्माचार्यले सानदार प्रदर्शनका साथ पाँच विकेट लिँदै नेपाललाई बलियो स्थितिमा पुर्याएकी थिइन् ।

टोलीको स्ट्राइक बलरको भूमिकामा पहिलो प्रतियोगिता खेलिरहेकी अस्मिनाको उत्कृष्ट बलिङमा युएई १९.५ ओभरमा ८१ रनमा अल आउट भयो । उनले ३.५ ओभरमा १० रन खर्चेर पाँच विकेट लिइन् । यसअघि प्रतियोगितामा युएईका शीर्ष तीन ब्याटरले पूरै प्रतियोगिता खेलेका थिए । तर अस्मिनाले दुवै ओपनर सुरुमै आउट गर्दै पहिलो पटक मध्यक्रमका ब्याटरलाई खेल्नुपर्ने बनाइदिन् ।

ओपनर थीर्थ सतिशलाई अस्मिानले पाँच रनमा बोल्ड गरिन् । अस्मिनाल छैटौं ओभरको पाँचौं बलमा ओपनर ईशा रोहित ओझालाई १५ रनमा बोल्ड गर्दै नेपालउत्कृष्ट सुरुवात दिलाइन् । ईशाको विकेट जुन खेलको टर्निङ प्वाइन्ट विकेट थियो । ईशाले कतारविरुद्ध १ सय १५ रनको शतकीय इनिङ खेलेकी थिइन् । टि२० आईमा बहराइनविरुद्ध १ सय ५८ रनको इनिङ खेलेकी उनको प्रदर्शन निकै महत्त्वपूर्ण हुने थियो । एसोसिएट महिला क्रिकेटकी उत्कृष्ट ब्याटर ईशा आउट पछि सीता रानामगर र इन्दु बर्माले युएईको मध्यक्रममा निरन्तर विकेट चट्काउँदै सस्तैमा अल आउट गरे ।

अस्मिनाले अन्तिम ओभरमा तीन विकेट लिँदै व्यक्तिगत पाँच विकेट पूरा गरिन् । उनी एक समय ह्याट्रिकको नजिक पनि पुगेकी थिइन् । अन्तिम ओभरको दोस्रो वैष्णवे महेशलाई ११ बलमा एक चौका सहित १६ रनमा सीताबाट क्याच गराइन् । लगत्तै अर्को बलमा इन्धुजा नन्दाकुमारलाई संंगिताबाट क्याच गराएकी थिइन् । चौथो बलमा सुरक्षा कोटे एज लागेपनि विकेटकिपर ज्योति पाण्डेले क्याच छाड्दा अस्मिना ह्याट्रिकबाट चुकिन् । पाँचौं बलमा सिया गोखलेलाई पाण्डेबाट क्याच गराउँदै पाँच विकेट पूरा गरिन् ।

अस्मिनाले नेपालबाट खेलेको सातौं खेलमै पाँच विकेट लिन सफल भएकी हुन् । उनीअघि नेरी थापा र अञ्जली चन्दले टि२० आईमा ६–६ विकेट लिएका थिए । तर अस्मिनाले त्यो खुसी धेरै समय संगाल्न पाइनन् । वर्षाका कारण दोस्रो इनिङ सम्भव नहुँदा खेल रद्द भयो र नेपाल बाहिरिनु पर्यो । युएई समूह ए को विजेता कारण फाइनलमा पुग्यो । नेपाल समूह ए को उपविजेताको रुपमा सेमिफाइनल खेलेको थियो ।

कुनैपनि खेलाडीको लागि अन्तर्राष्ट्रिय क्रिकेटमा पाँच विकेट निकै महत्त्वपूर्ण हुन्छ । अस्मिना सिनियर टोलीमा यात्रा थालेको छोटो समयमै यो उपलब्धि हात पारिन् । महत्त्वपूर्ण खेलमा टोलीको अपेक्षा अनुसार ड्रिम प्रदर्शन गरेपनि फाइनलमा पुर्याउन सकिनन् । खेल रद्दपछि अस्मिनाको बाहिरिएको तस्विरले फाइनल र एसिया कप छनोट नहुनुको पिडा आफैं प्रष्ट्याउँछ ।

हङकङविरुद्ध नेपालले अस्मिनालाई भने बेन्चमा राखेको थियो । सबनम राईलाई बेन्चमा राख्दै अस्मिनलाई प्लेइङ ११ मा मौका दिएको थियो । त्यसअघि उनले भुटान, बहराइन र कुवेतविरुद्ध कसिलो बलिङका साथ एक एक विकेट लिएकी थिइन् ।

अस्मिनाले घरेलु क्रिकेटमा लामो समय देखि प्रभाव जमाएपनि सिनियर टोलीमा डेब्यूको अवसर भने पाएकी थिइनन् । उनको गति नै प्रमुख खुबी हो । गत महिना डेब्यु गरेयता भने उनले गजबको प्रदर्शन गरेकी छिन् । जारी प्रतियोगितामा अस्मिना ८ विकेटका साथ सर्वाधिक विकेट लिने खेलाडीको सूचिमा शीर्षस्थानमा छिन् ।

अस्मिनाले दुई महिना अघि युगान्डासँग भएको पाँच टि२० आई सिरिज अन्तर्गत पहिलो खेलमा टियु मैदानमा डेब्यू गरेकी थिइन् । उनलाई कप्तान रुविनाले डेब्यू क्याप दिएकी थिइन् । तर त्यसपछि नेपालले दोस्रो र तेस्रो खेलमा मौका दिएन । चौथो र पाँचौं खेल खेल्दै लगातार जित दिलाएकी थिइन् ।

‘डेब्यू धेरै राम्रो भयो । यो भन्दा बढी मिहिनेत गर्नुपर्छ भनेर सोचका साथ अघि बढेको छु । आगमी दिनमा झनै राम्रो गर्नेछु’, मलेसिया जानुअघि अस्मिनाले भनेकी थिइन् ।

अस्मिनाले २०१९ मा वुमन्स च्याम्पियन्स लिग (डब्लूसिएल) मा विराटनगर टाइटन्सबाट खेल्दै राम्रो प्रभाव छाडेकी थिइन् । त्यसपछि उनले बागमतीबाट कप्तानीका साथ घरेलु क्रिकेटमा सानदार प्रदर्शन गर्दै आएकी थिइन् । कागजी रुपमा विकेट धेरै लिन नसकेपनि मैदानमा उनको प्रभाव भने अब्बल थियो ।

‘पछाडिबाट हेर्दा सबै मिहिनेतहरु समय लागेपनि राम्रो भएको छ । हामीले नतिजा दिन सकेनौं । व्यक्तिगत रुपमा हेर्दा मैले राम्रो गरेजस्तो लाग्छ’, डेब्यू गर्दाको क्षण सम्झदै उनले भनेकी थिइन् ।

अस्मिनाले बागमतीको युवा टोलीको कप्तानी सम्हाल्दै घरेलु क्रिकेटमा प्रदर्शन गरेकी छिन् । एकतर्फबाट उनले राम्रो प्रदर्शन गरेपनि अर्कोतर्फबाट त्यो साथ पाउन सकेकी थिइनन् । तर सिनियर टोलीमा कविता कुँवरको साथ पाएपछि प्रदर्शनमा अझ निखार आएको छ ।

बलिङ साझेदारीले प्रदर्शनमा धेरै फरक पार्छ । एउटा एण्डबाट राम्रो हुँदा अर्कोबाट नहुँदा धेरै गाह्रो पर्छ । बलिङ साझेदारी हुँदा टिम र व्यक्तिगत दुवै प्रदर्शनमा फरक पार्ने उनले बुझेकी छिन् ।

‘सायद साझेदारी नहुँदा पनि अपेक्षा अनुसार घरेलु क्रिकेटमा प्रदर्शन नआएको हुनसक्छ । हाम्रो टिम हेर्ने हो बागमती विकासोन्मुख युवा टोली छ । त्यसैले मैले धेरै आशा राख्नुपनि हुँदैन । सकेसम्म टिमलाई शतप्रतिशत क्षमतामा लान खोजी राखेको छु’, अस्मिनाले भनिन् ।

कुनैपनि खेलाडीले एक दुई प्रतियोगिताबाट प्रर्दशन पनि राम्रोसँग देखाउन पाउँदैन । महिला क्रिकेट अहिलेपनि वर्षमा एक दुई प्रतियोगितामा सिमित हुँदै आएको छ । विराटनगर डब्लूसिएलको क्वालिफायरबाट बाहिरिदा अस्मिनाको प्रर्दशन मध्यम थियो ।

को हुन् अस्मिना ?

अस्मिना नेपाली क्रिकेटमा उमेर समुह हुँदै घरेलु प्रतियोगितामा राम्रो प्रर्दशन गर्दै आएकी तीव्र गतिकी बलिङ अलराउन्डर हुन् । बुबा पूर्णबहादुर र आमा पार्वती कर्माचार्यबाट पहिलो सन्तानको रुपमा उनको दक्षिणकालीमा जन्म भएको हो । बुबा रेष्टुरेन्ट व्यावसायमा तथा आमाको आफ्नै टेलर छ । त्रिभुवन आदर्श स्कुलमा कक्षा ९ मा पढ्दै गर्दा अस्मिनाले क्रिकेट सिक्न थालेकी थिइन् ।

पहिला १३-१४ वर्षको उमेरमा अस्मिना रमाइलोको लागि क्रिकेट खेल्ने गर्दथिन् । अस्मिना स्कुलमा पढ्दा सानै देखि खेलकुदमा धेरै रुचि राख्नी गर्थिन् । सानोमा उनले भलिबल, ब्याडमिन्टन र बास्केटबल पनि खेलेकी थिइन् । अस्मिनाले पहिलो प्रतियोगिताको रुपमा २०७१ सालमा जनकपुरमा भएको यू–१६ क्रिकेट प्रतियोगिता काठमाडौंबाट खेलिन् । त्यसै वर्ष काठमाडौंमै भएको यू–१९ पनि खेलिन् । जसमा सुपर ओभरमा नेपालगञ्जलाई ११ रन चाहिएको बेला ९ रन दिएर काठमाडौंलाई जिताएकी थिइन् । त्यसपछि क्यान निलम्बनले यू–१९ प्रतियोगिता नै हुन छाड्यो ।

‘परिवारबाट राम्रो साथ छ । कहिलेकाहीं निराश हुँदा बुबा र ममीले सम्झाउनु हुन्छ र अझ बढि मिहिनेत गर्न प्रेरणा मिल्छ । आज म जहाँ छु त्यो सबै बुबा-ममीको साथ र सहयोगको कारण नै छु’, अस्मिनाले भनिन् ।

सीएम कप,आठौं राष्ट्रिय खेलुकद प्रतियोगिता र पीएम कपमा अस्मिानले कसिलो बलिङ गरेको थिइन् । प्रधानमन्त्री कपका पछिल्ला दुई संस्करणमा अस्मिनाले बागमतीको नेतृत्व गरिन् । अस्मिना १३ औं दक्षिण एसियाली खेलकुद सागमा नेपालको वैकल्पिक खेलाडीको सूचिमा थिइन् ।

सुरुमा काठमाडौं क्रिकेट टेनिङ सेन्टर (केसीटिसी) बाट प्रशिक्षण लिएकी उनी सुरुमा ब्याटर थिइन् । रमाइलोको लागि ब्याटिङ गर्ने उनले एक दाईले तिम्रो बलिङ राम्रो छ यसैलाई निरन्तरता देउ भनेपछि बलिङ गर्न थालेको बताउछिन् । तल्लोक्रममा उनले राम्रो ब्याटिङको क्षमता समेत राख्ने गर्दछिन् ।

भारतीय ब्याटर विराट कोहलीको ब्याटिङबाट प्रभावित भएको उनी अष्ट्रेलिया पूर्व तीव्र गतिका बलर ब्रेट ली लाई आफुले क्रिकेट खेल्न थाले देखीनै पछ्याउन थालेको बताउँछिन् ।

‘अस्मिनाले क्रमश: सुधार गर्दैछ । केहि पक्षमा धेरै सुधार पनि गरेको छ । हेरौं कसरी आफूलाई प्रस्तुत गर्छ । समग्रमा हेर्दा राम्रो छ’, महिला टोलीका मुख्य प्रशिक्षक जगत टमटाले टोली प्रस्थान गर्नुअघि बताएका थिए । उनले भनेजस्तै प्रशिक्षणमा गरेको सुधार मैदानमा पनि देखिएको छ ।

अस्मिना नेपाली महिला क्रिकेटकी भविष्य हुन् । बलिङ अलराउन्डरमा अन्तर्राष्ट्रिय क्रिकेटमा राम्रो प्रभाव जमाउन सक्छिन् । त्यसको लागि टोली, प्रशिक्षक र व्यवस्थापनले उनीमाथि धैर्यता, लगानी र विश्वास देखाउन सक्नुपर्छ । एक खेलमा राम्रो नहुँदा बेन्चमा वा टोली बाहिर राख्ने गल्ती दोहोराउनु हुँदैन । सधैं राम्रो हुन्छ भने हुँदैन । किनभने उनीलाई खराब प्रदर्शनमा विश्वास देखाउन सके झनै राम्रो प्रदर्शन गर्नेछिन् । अस्मिनाको यो त सुरुवात मात्रै हो । उनले आगमी दिनमा यो भन्दा उत्कृष्ट प्रदर्शन गर्नेमा कुनै शंका छैन ।

नेपाललाई विश्वकप खेलाउने सपना देखेकी अस्मिनालाई राम्रोसँग सदुपयोग गर्न सके आगमी दिनमा प्रमुख हतियार हुन सक्छिन् । अस्मिना आफ्नो उच्च प्रदर्शनमा नेपाललाई अर्को स्तरमा पुर्याउन सक्ने खुबी भएकी खेलाडी हुन् । त्यसको लागि नेपालले उनलाई निरन्तर अवसर दिनुपर्छ । कविता र अस्मिना दुवै युवा खेलाडी रहेकाले राम्रो प्रशिक्षण र अवसर पाए नेपालले दीर्घकालीन रुपमा तीव्र गतिको बलर समस्याबाट मुक्ति पाउने देखिन्छ ।