एजेन्सी – भारत विश्व क्रिकेटको एक शक्तिशाली देश हो । भारतले तीनै शैलीमा अन्तर्राष्ट्रिय क्रिकेटमा आफ्नो प्रभाव जमाउँदै आएको छ । लगातार सानदार प्रदर्शन गर्दै आएको भारत विश्वकपमा उपाधिबाट भने चुक्दै आएको छ । भारतले सन् २०१३ को च्याम्पियन्स ट्रफीपछि आइसिसीको ठूलो प्रतियोगिता जित्न सकेको छैन ।

भारतीय क्रिकेटमा सौरभ गांगुलीको कप्तानीबाट परिवर्तनको सुरुवात भएको हो । विकेटकिपर महेन्द्रसिंह धोनीले तीनै शैली (टि२० विश्वकप, एकदिवसिय विश्वकप र च्याम्पियन्स ट्रफी) उपाधि जिताए । विराट कोहलीले उपाधि जित्न नसकाएपनि तीनै शैलीमा विश्व क्रिकेटमा सानदार प्रदर्शन गरे ।

कोहलीले कप्तानी छाडेपछि रोहित शर्माले भारतको नेतृत्व सम्हाल्लेका छन् । भारत विश्वकप उपाधिको भोकमा छ । इन्डियन प्रिमियर लिग (आइपिएल) का सर्वाधिक च्याम्पियन कप्तान रोहित शर्मालाई यो वर्ष अष्ट्रेलियामा हुने टि२० विश्वकप र आगमी वर्ष घरेलु मैदानमा हुने एकदिवसिय विश्वकप प्रमुख चुनौती हुन् । त्यसपछि भारत नयाँ कप्तानको साथ अघि बढ्ने अनुमान गरिएको छ ।

असल नेतृत्व नभएमा टोलीलाई नतिजा ल्याउन कठिन पर्छ । टिम निर्माणमा ठूलो असर पर्ने विश्व क्रिकेटमा थुप्रै उदाहरण छन् । श्रीलंका त्यसको एक राम्रो उदाहरण हो । त्यसैले भारतले केहि सिरिजमा फरक फरक कप्तान बनाउँदै तयार पारेको छ । रोहितपछि भारतीय क्रिकेट सम्हाल्न सक्ने सम्भावित पाँच कप्तान यस प्रकार छन् ।

५.श्रेयस ऐर

भारतीय क्रिकेट टोलीका युवा ब्याटर श्रेयस ऐर भरपर्दा मध्यक्रमका खेलाडी हुन् । उनले आइपिएलमा दिल्ली क्यापिटल्स २०१८ देखि २०२१ र यस सिजन कोलकाता नाइट राइडर्सको कप्तानी गर्दै आएका छन् ।

ऐरको कप्तानीमा दिल्लीले आइपिएलमा सानदार प्रदर्शन गरेको थियो । घरेलु क्रिकेटमा ऐरले मुम्बईको नै नेतृत्व गर्ने गर्दछन् । मध्यक्रमका भरपर्दा ब्याटर हुँदा भारत ऐरलाई नेतृत्व दिनसक्छ । किन भने ऐर तीनै शैलीमा सानदार प्रदर्शन गर्नसक्ने खेलाडी हुन् । अर्कोतर्फ उनलाई कप्तानी दिँदा लामो समय सम्म नेतृत्व सम्हाल्न सक्छन् ।

४. हार्दिक पान्ड्या

इन्डियन प्रिमियर लिग (आइपिएल) २०२२ मा पहिलो कप्तानीमै गुजरात टाइटन्सलाई च्याम्पियन बनाएपछि हार्दिक भारतको कप्तानको रुपमा देखिएका छन् । तुलनात्मक रुपमा प्रतियोगिताकै कमजोर मानिएको गुजरातलाई हार्दिकले आफ्नो प्रदर्शन र कप्तानीमा उपाधि दिलाएका थिए । भारतका वर्तमान समयका उत्कृष्ट अलराउन्डर हार्दिक पनि तीनै शैलीका खेलाडी मानिन्छन् ।

भारतले हार्दिकको यसै साता आयरल्यान्डसँगको दुई टि२० आई सिरिजमा क्लिनस्विप गरेको थियो । भारत पछिल्लो समय आइसिसीको ठूलो प्रतियोगिता उपाधि चाहेको छ । हार्दिकको उत्कृष्ट अलराउन्ड प्रदर्शनको सहयोगमै मुम्बईले पछिल्ला चार उपाधि जितेको थियो ।

हार्दिक अलराउन्डर खेलाडी हुँदा उनलाई कप्तानी दिनसक्छ । तर हार्दिकले आफ्नो फिटनेशमा भने सुधार गर्न आवश्यक देखिन्छ । ब्याक पेनका कारण हार्दिक पछिल्लो समय नियमित भारतीय टोलीमा भने छैनन् ।
३. जस्प्रित बुमराह

तीव्र गतिका बलर जस्प्रित बुमराह भारतका प्रमुख खेलाडी हुन् । बुमराह विश्व क्रिकेटका वर्तमान समयका एक उत्कृष्ट बलर हुन् । उनको योर्कर विपक्षी ब्याटरलाई सामना गर्न कठिन पर्ने गर्दछ । बुमराहले तीनै शैलीमा लगातार सानदार प्रदर्शन गर्दै आएका छन् ।

गत फेब्रुअरीमा श्रीलंकाविरुद्ध टि२० आई सिरिजमा बुमराहलाई भारतले उपकप्तान नियुक्त गरेको थियो । बुमराहले हालसम्म कप्तानी भने गरेका छैनन् । कोरोना कारण रोहित शर्माले इंग्ल्यान्डसँगको पाँचौं टेस्ट खेल गुमाउने छन् । शुक्रबारदेखि सुरु हुने उक्त टेस्ट खेल बुमराहले कप्तानी गर्ने लगभग निश्चित छ । बुमराहलाई तयार पार्न सकेमा उनी दीर्घकालिन कप्तान बन्नसक्छन् ।

२.ऋषभ पन्त

विकेटकिपर ऋषभ पन्त आक्रामक ब्याटिङका लागि चिनिन्छन् । पन्तको कप्तानीमा दिल्ली २०२१ मा पहिलो पटक आइपिएलको फाइनलमा पुगेको थियो ।

भारतले दक्षिण अफ्रिकासँग पाँच टि२० आई खेलमा पन्तलाई नै कप्तानी जिम्मेवारी दिएको थियो । उक्त सिरिज २–२ को बराबरीमा सकिएको थियो । पन्त विकेटकिपरको साथै तीनै शैलीको खेलाडी हुन् ।

विकेटकिपरलाई फिल्डिङ सजावट देखि बलर परिवर्तन गर्न र विपक्षी ब्याटरको कमजोरी पत्ता लगाउन सजिलो हुन्छ । पन्त भारतको आगमी कप्तानका दाबेदार खेलाडी हुन् । रोहितपछि पन्त पनि कप्तानका दाबेदार हुन् ।

१.लोकेश राहुल

लोकेश राहुल भारतीय वर्तमान क्रिकेट टोलीका प्रमुख ब्याटर हुन् । उनले तीनै शैलीमा लगातार उत्कृष्ट प्रदर्शन गर्दै आएका छन् । राहुल भारतीय क्रिकेट टोलीका उपकप्तान समेत हुन् । लगातार उत्कृष्ट प्रदर्शन गर्दै आएका राहुलले पन्जाव किंग्सको तीन संस्करण र यस सिजन लखनऊ सुपर जायन्ट्सको कप्तानी सम्हाल्लेका छन् ।

जिम्मेवारी र क्लासिक प्रदर्शन राहुलको खुबी हो । आगमी विश्वकप पछि रोहितले छाड्दा राहुल टोलीका प्रमुख र अनुभवी खेलाडी हुनेछन् ।

रोहितको अनुपस्थीतिमा राहुलले भारतबाट ओडिआई र टेस्टमा कप्तानी गरि सकेका छन् । जिम्मेवारी र निरन्तर सानदार प्रदर्शन गरेको हुँदा राहुलले नेतृत्व गर्ने सम्भावना छ ।