काठमाडौं (हाम्रो खेलकुद) – रोहित पौडेल र दीपेन्द्रसिंह ऐरीको उत्कृष्ट ब्याटिङमा नेपालले टि२० अभ्यास खेलमा क्यानाडाको ओन्टारियो क्रिकेट क्लबलाई २ सय १० रनको विशाल लक्ष्य दिएको छ ।

किंग सिटीमा मेपल लिफ मैदानमा टस जितेर पहिला ब्याटिङ रोजेको नेपालले निर्धारित २० ओभरमा ४ विकेट गुमाउँदै २ सय ९ रन बनायो । नेपालका लागि रोहित पौडेल ३१ बलमा ५ चौका र ५ छक्कासहित सर्वाधिक ७१ रनमा अविजित रहे ।

दीापेन्द्रसिंह ऐरीले २७ बलमा ६ चौका र २ छक्कासहित ५४ रनमा आउट भए । नेपाललाई पहिलो विकेटका लागि ओपनर कुशल भुर्तेल र पवन सरार्फले २.५ ओभरमा १६ रनको साझेदारी गरेका थिए । कुशल रेमाण्ड बाइनको बलमा जश शाहबाट २ रनमा क्याच आउट भए । ओपनर आसिफ शेखलाई विश्राम दिँदा पवन ओपनिङ पठाएको थियो ।

देव खनाल बरुण सहदेव १३ बलमा २ चौका र १ छक्कासहित २० रनमा बोल्ड आउट भए । ओपनर पवन सरार्फ ३४ बलमा ५ चौकासहित ३७ रनमा क्याच आउट भए । तेस्रो विकेटका लागि दीपेन्द्र र पवनले ४० रनको साझेदारी गरेका थिए ।

चौथो विकेटका लागि दीपेन्द्र र रोहितले ५४ रनको साझेदारी गरेका थिए । दीपेन्द्र हसन मिराजको बलमा लङअफमा अमर खलिदबाट क्याच भए । आदिल अन्सारी १० बलमा १० रनमा अविजित रहे ।

पाँचौं विकेटका लागि आदिल र रोहितले ६७ रनको अविजित साझेदारी गरेका थिए । ओन्टारियोका रेमाण्ड, बरुण, किनान र हसनले १-१ विकेट लिए ।

एकदिवसिय अभ्यास खेलमा भने नेपालले ओन्टारियो क्रिकेट क्लबलाई ६९ रनले हराएको थियो ।