एजेन्सी – अलरााउन्डर हार्दिक पान्ड्याले बलिङ र ब्याटिङ दुबैमा करिअरको उत्कृष्ट प्रदर्शन गरेपछि भारतले पहिलो टि२० आई खेलमा घरेलु टोली इंग्ल्यान्डलाई ५० रनले पराजित गरेको छ । योसँगै तीन खेलको सिरिजमा भारतले १–० को अग्रता लिएको छ ।

जितको १ सय ९९ रनको विशाल विजयी लक्ष्य पछ्याएको इंग्ल्यान्ड १९.३ ओभरमा १ सय ४८ रनमा अल आउट भयो ।इंग्ल्यान्डका मोईन अलीले २० बलमा ४ चौका र २ छक्कासहित सर्वाधिक ३६ रनको योगदान दिए । युवा ब्याटर ह्यारी ब्रुकले २३ बलमा २ चौका र १ छक्कासहित २८ रन जोडे । क्रिस जोर्डन १७ बलमा २ चौका र १ छक्कासहित २६ रनमा अविजित रहे ।

एक समय ३३-४ को अवस्थामा पुगेको इंग्ल्यान्डलाई पाँचौं विकेटका लागि मोईन अली र ह्यारी ब्रुकले ६१ रनको साझेदारी गर्दै जितको आशा दिलाएका थिए । तर ह्यारी युजभेन्द्र चहलको १३ औं ओभरको पहिलो बलमा डिप मिडविकेटमा सूर्यकुमार यादवबाट क्याच भएपछि इंग्ल्यान्डको जितको सम्भावना सकिएको थियो ।

तीव्र गतिका बलर भुवनेश्वर कुमारले पहिलो ओभरको पाँचौं बलमा कप्तान तथा विष्फोटक ब्याटर जस बटलरलाई शून्यमा बोल्ड आउट गरे । बटलर इनस्वीङ बलमा गोल्डेन डक भएपछि लगातार दबाबमा पर्यो । हार्दिक पान्ड्याले पाँचौं ओभरमा दुई विकेट लिँदै खेल पूर्ण रुपमा हाबी बनाए ।

दोस्रो बलमा डेविड मलान १४ बलमा ४ चौकासहित २१ रनमा बोल्ड भए । अन्तिम बलमा लियाम लिभिङस्टोन शून्यमा क्याच आउट भएपछि इंग्ल्यान्ड २९–३ को अवस्थामा पुगेको थियो ।

हार्दिककै बलमा एज लागेर जेसन रोय १६ बल खेल्दै ४ रनमा थर्डम्यानमा हर्षल पटेलबाट क्याच आउट भए । साम करन ४ रनमा आउट भए । भारतका हार्दिक पान्ड्याले ४ ओभरमा ३३ रन खर्चेर ४ विकेट लिए । स्पिनर युजभेन्द्र चहलले ४ ओभरमा ३२ रन खर्चेर २ विकेट लिए ।

डेब्यू खेल खेलेका अर्शदीप सिंहले ३.३ ओभरमा १ मेडनसहित १८ रन खर्चेर २ विकेट लिए । हर्षल पटेल र भुवनेश्वर कुमारले १–१ विकेट लिए ।

त्यसअघि साउथह्याप्टनमा टस जितेर पहिला ब्याटिङ थालेको भारतले निर्धारित २० ओभरमा ८ विकेट गुमाउँदै १ सय ९८ रन बनायो । भारतका हार्दिक पान्ड्याले ३३ बलमा ६ चौका र १ छक्कासहित सर्वाधिक ५१ रन बनाए । यो पहिलो टि२० आई अर्धशतक हो । म्याथ्यु पार्किसनलाई छक्का हान्दै ३० बलमा पूरा गरेका थिए ।

कप्तान रोहित शर्मा स्पिनर मोईन अलीको बलमा एज लागेर जस बटलरबाट क्याच आउट हुनुअघि १४ बलमा ५ चौकासहित २४ रनमा आउट भए । अलीको पाँचौं ओभरको पाँचौं बलमा ईशान किशन टप एज लागेर फाइन लेगमा ८ रनमा म्याथ्यु पार्किसनको बलमा आउट भए ।

तेस्रो विकेटका लागि दीपक हुडा र सूर्य कुमार यादवले ४३ रनको साझेदारी गरेका थिए । जोर्डन को बलमा दीपक फाइन लेगमा टाइमल मिल्सबाट ३३ रनमा क्याच भए । उनले १७ बलमा ३ चौका र २ छक्का प्रहार गरे ।

सूर्य १९ बलमा ४ चौका र २ छक्कासहित ३९ रनमा बटलरबाट क्याच आउट भए । सूर्य जोर्डनको १२ औं ओभरको चौथो बाउन्सर बलले गल्भ्समा लागेर आउट भएका थिए । इंग्ल्यान्डले रिभ्यु लिँदै आउट गरेको थियो ।

स्पिनर म्याथ्यु पार्किसनको १५ औं ओभरको दोस्रो बलमा जस बटलर हार्दिक पान्ड्यालाई ३७ रनमा स्टम्पिङ आउट गर्नबाट चुकेका थिए । पाँचौं विकेटका लागि हार्दिक र अक्षर पटेलले ४५ रनको साझेदारी गरेका थिए । अक्षर १२ बलमा ३ चौकासहित १७ रनमा आउट भए । दीनेश कार्तिक ११ र हर्षल पटेलले ३ रन बनाए ।

भारतले १३ ओभरमा ४ विकेट गुमाउँदै १ सय ४१ रन बनाएको थियो । अन्तिम ७ ओभरमा ४ विकेट गुमाउँदै ५७ रन मात्र जोडेपछि २ सय माथिको योगफल बनाउनबाट चुकेको थियो ।

इंग्ल्यान्डका क्रिस जोर्डनले ४ ओभरमा २३ रन खर्चेर दुई महत्वपूर्ण विकेट लिए । मोईन अलीले २ ओभरमा २६ रन खर्चेर २ विकेट लिए । रोस टोपली, टाइमल मिल्स र म्याथ्यु पार्किसनले एक एक विकेट लिए । दोस्रो खेल शनिबार हुनेछ ।