एजेन्सी – शीर्षक्रमका ब्याटर मार्नस लाबुसेन र स्टिभ स्मिथको शतकमा अष्ट्रेलियाले श्रीलंकासँगको दोस्रो टेस्ट खेलमा पहिलो दिन मजबुत ब्याटिङ गरेको छ । पहिलो दिनको समाप्तिमा गाले अन्तर्राष्ट्रिय स्टेडियममा टस जितेर ९० ओभरमा २९८–५ को अवस्थामा छ ।

स्टिभ स्मिथ २ सय १२ बलमा १४ चौकासहित १ सय ९ रनमा अविजित छन् । स्मिथको यो टेस्ट करिअरको २८ औं शतक हो । स्मिथले १८ महिनापछि पहिलो शतक प्रहार गरेका हुन् । मार्नस लाबुसेन १ सय ५६ बलमा १२ चौकासहित १ सय ४ रनमा आउट भए । लाबुसेनको यो टेस्ट करिअरको सातौं र घरबाहिर पहिलो शतक हो ।

ओपनर उस्मान खवाजा ७७ बलमा ४ चौकासहित ३७ रनमा आउट भए । डेविड वार्नर ५, ट्रविस हेड १२ र क्यामरन ग्रिन ४ रनमा आउट भए । तेस्रो विकेटका लागि लाबुसेन र स्मिथले १ सय ३४ रनको शतकीय साझेदारी गरेका थिए । विकेटकिपर एलेक्स केरी १६ रनमा अविजित छन् ।

श्रीलंकाका डेब्यू खेल खेलेका प्रभात जयसूर्याले सर्वाधिक तीन विकेट लिए । कसुन रजिथा र रमेश मेन्डिसले एक एक विकेट लिए । दुई टेस्ट खेलको सिरिजमा अष्ट्रेलिया १–० ले अघि छ । पहिलो खेलमा अष्ट्रेलिया १० विकेटले विजयी भएको थियो ।