काठमाडौं (हाम्रो खेलकुद) – आइसिसी विश्वकप लिग–२ त्रिकोणात्मक ओडिआई सिरिजमा नामिबियाले प्रस्तुत गरेको प्रतिस्पर्धात्मक लक्ष्य पछ्याउनेक्रममा नेपालले खराब सुरुवात गरेको छ । जितका लागि २ सय २१ रनको प्रतिस्पर्धात्मक विजयी लक्ष्य पछ्याएको नेपालले १५ ओभरमा ३ विकेट गुमाउँदै ५१ रन बनाएको छ ।

नेपालका दीपेन्द्रसिंह ऐरी र देव खनाल क्रिजमा छन् । ओपनर आसिफ शेख १४ र कुशल भुर्तेल २७ रनमा आउट भए । तीव्र गतिका बलर जान फ्रिलिंकको आठों ओभरको पहिलो बलमा आसिफ कभरमा डिभान ला कुकबाट क्याच भए ।

कुशल बेर्नार्ड शोल्ट्ज़को बलमा विकेटकिपर जिन ग्रिनबाट स्टम्पिङ आउट भए । कुशलले ४६ बलमा २ चौका र १ छक्का प्रहार गरे । आसिफले २० बलमा २ चौका प्रहार गरे । रोहित पौडेल शून्यमा रन आउट भए ।

त्यसअघि क्याम्बुस्दुन न्यू ग्राउन्डमा टस जितेर पहिला ब्याटिङ थालेको नामिबिया ४७.३ ओभरमा २ सय २० रनमा अल आउट भयो । नामिबियाका छैटौं नम्बरका ब्याटर जान निकोल लोफ्टी एटोनले ६९ बलमा ५ चौका र १ छक्कासहित सर्वाधिक ६० रन बनाए । डिभान ला कक ३२ बलमा ७ चौकासहित ४१ रनमा आउट भए ।

नेपालका कप्तान सन्दीप लामिछानेले १० ओभरमा ५४ रन खर्चेर ४ विकेट लिए । सोमपाल कामीले ७ ओभरमा ४४ रन खर्चेर २ विकेट लिए । करण केसी, बसिर अहमद र दीपेन्द्रसिंह ऐरीले १-१ विकेट लिए ।