काठमाडौं (हाम्रो खेलकुद) – नेपाली राष्ट्रिय क्रिकेट टोलीले आइसीसी विश्वकप लिग २ अन्तर्गत त्रिकोणात्मक सिरिजको तेस्रो खेलमा एक परिवर्तन गर्ने क्रममा करण केसीलाई बाहिर राखेको छ ।

स्कटल्यान्डको एरस्थित काम्बसडन मैदानमा नामिबियाका कप्तान जेरार्ड एरास्मसले टस जितेर ब्याटिङ रोजेका हुन् । स्कटल्यान्डमा जारी त्रिकोणात्मक सिरिज अन्तर्गत नेपाल तेस्रो खेल खेल्दैछ । यसअघि २ खेलमा नेपालले १ जित र १ हार बेहोरेको छ । दुवै खेलमा नेपालको बलिङ प्रदर्शन उत्कृष्ट रहेको छ ।

नेपाल पहिलो खेलमा नामिबियासँग ४० रनले पराजित भएको थियो । तर त्यसपछि नेपालले घरेलु टोली स्कटल्यान्डलाई पहिलो पटक हराउँदै इतिहास रचेको छ । उक्त जितपछि नेपाल उच्च मनोबलका साथ नामिबियासँग उत्रनेछ ।

आजको खेलमा नेपालले तीव्र गतिका बलर करण केसीलाई बाहिर राखेको छ । उनको स्थानमा पवन सर्राफले टोलीमा स्थान बनाएका छन् । करणले आइसीसी विश्वकप लिग-२ मा पहिलो पटक कुनै खेल गुमाएका हुन् । करण र सन्दीपले लिग-२ सिरिजको हालसम्म भएका सबै खेल खेलेका थिए ।

करणले हालसम्म यस प्रतियोगितामा १८ खेलमा ३७ विकेट लिएका छन् । सन्दीपले पनि १८ खेलमा समान ३७ विकेट नै लिएका छन् । यी दुईपछि नेपालबाट सर्वाधिक विकेट लिने सोमपाल कामी छन् । उनले १४ खेलमा २० विकेट हात पारेका छन् ।

पवनले लिग-२ अन्तर्गत यसअघि यूएई र पपुवा न्युगिनी विरुद्ध खेलेका थिए । त्यसबाहेक उनले कुल ७ ओडीआई खेलेका छन् । स्पिन अलराउन्डर पवन टोलीमा फरक-फरक भूमिकामा रहेका छन् ।

आजको टिम :

आसिफ शेख (विकेटकिपर), कुशल भुर्तेल, देव खनाल, रोहित पौडेल (उपकप्तान), दीपेन्द्रसिंह ऐरी, आरिफ शेख, आदिल अन्सारी, पवन सर्राफ, सोमपाल कामी, सन्दीप लामिछाने (कप्तान) र बसिर अहमद ।