काठमाडौं (हाम्रो खेलकुद)– महिला क्रिकेटमा भएको अनिमियतता र गै¥ह जिम्मेवारीको बारेमा छानविन गर्न राष्ट्रिय खेलकुद परिषद (राखेप) ले सदस्य देव कुमार अधिकारीको संयोजकत्वमा शुक्रबार ५ सदस्यिय छानविन समिति गठन गरेको छ ।
गत असोजमा हङकङमा एक महिने प्रशिक्षण र महिला विश्वकपको खेलाडी छनोटमा अनियमितता भएको भन्ने उजुरीका आधारमा छानबिन समिति गठन गरेको राखेपले जनाएको छ ।
प्रशिक्षण र महिला विश्व कप छनोट प्रतियोगिताका लागि नेपाली खेलाडी छनोट गर्ने क्रममा क्यानका प्रशासन प्रमुख छुम्बि लामा, टोली प्रशिक्षक जगत टमाटा र टिम ब्यवस्थापक राजु बस्न्यातले खेलाडी छनोटका क्रममा गैर खेलाडी छनोट गरेको आरोप लगाएको छ । त्यस्तै प्रतियोगिताको लागि बरिष्ठ फिजियोथेरापिष्ट वा डाक्टर लानु पर्नेमा परिषदमा दुई बरिष्ठ फिजियोथेरापिष्ट र डाक्टर हुंदा हुंदै स्टाफ नर्सलाई फिजियोको टोलीलाई लगेको राखेपले जनाएको छ । त्यस्तै खेलाडीको ठाउमा चार गैर खेलाडीलाई आर्थिक लाभ लिई छनोट आर्थिक अनियमितता गरेको राखेपद्धारा जारी विज्ञप्तीमा उल्लेख छ ।
समितिको सदस्यहरुमा राखेपका प्रशासन प्रमुख मधुसुदन बस्नेत, खेलकुद विकास विभाग प्रमुख कुलबहादुर थापा, संघ संस्था प्रमुख डेमबहादुर बस्नेत र राखेप कानून बिज्ञ धनबहादुर बस्नेत रहेका छन् । समितिलाई एक महिनाको समय दिइएको छ । त्यहि समितिलाई रुस्लान थ्री स्टार क्लबले एएफसी प्ले अफ खेल्न नपाएका विषयमा छानविन गर्ने जिम्मा दिएको छ ।
