काठमाडौं (हाम्रो खेलकुद) – पुबुदु दासानायकेले मुख्य प्रशिक्षकबाट राजीनामा दिएपछि रिक्त रहेको पदमा नेपाल क्रिकेट संघ(क्यान) ले पछिल्लो प्रतिस्पर्धा सूचीबाट नै प्रशिक्षक नियुक्ती गर्ने तयारी गरेको छ ।

क्यानले तलब मिलेको खण्डमा पुरानै आवेदनबाट छनोट गरेर प्रशिक्षक नियुक्ती गर्ने गरी छलफल अघि बढाएको छ । क्यानले पुबुदु दासानायिकेलाई मासिक १० हजार अमेरिकी डलर दिँदै आएको थियो । त्यो पारिश्रमिकमा भने ठूला नामका प्रशिक्षक आउन तयार छैनन् । क्यानका जनरल म्यानेजर वृतान्त खनाल प्रशिक्षक नियुक्तीको लागि छलफलमै रहेको बताउँछन् ।

‘पुबुदुले बार्षिक १ करोड २० लाख माथि डलर तलब बुझ्ने गरेका थिए । तर अहिले त्यो तलबमा काम गर्न कसैले मानेका छैनन् । त्यो रकममा पनि प्रशिक्षक आउन मान्दैनन् । प्रशिक्षकहरुसँग छलफल गर्दा त्यति तलबमा सकिंदैन भन्छन्’, खनालले भने ।

खनाल क्यान अध्यक्ष चतुरबहादुर चन्द र कार्यवाहक सचिव प्रशान्त विक्रम मल्ल नेपाल आएपछि मात्र कसरि बढ्ने भन्ने थाहा हुने बताए । चन्द र मल्ल आइसिसीको वार्षिक साधरण सभामा भाग लिन इंग्ल्यान्ड गएको हुँदा शुक्रबार नेपाल आइपुग्नेछन् ।

‘आइसिसीका अनुसार पुबुदुले आफ्नो सम्झौताको कार्यकाल सकाएको भए प्रतिस्पर्धामा जानुपर्ने थियो । तर सम्झौताको बीचमै छाडेर गएको हुँदा यसअघिको सर्टलिस्टबाट कुनै एउटा राम्रोलाई ल्याउन मिल्छ’, खनालले भने ।

यसअघिको सर्ट लिष्ट अनुसार भारतीय मोन्टी देशाई मुख्य दाबेदार हुन् । वर्तमान समयमा वेस्टइन्डिजका ब्याटिङ प्रशिक्षक समेत रहेका देशाई नेपाल आउन इच्छुक छन् । गत वर्षमा अन्तिम समयमा देशाई छाडेर पुबुदुलाई ल्याउने निर्णय गरेको थियो । त्यस समय खेलाडी विवाद हुँदा क्यानले स्थिति नियन्त्रणमा गर्न आफु अनुकूल प्रशिक्षक ल्याएको थियो ।

खनाल प्रशिक्षक नियुक्तिको जिम्मेवारी बोर्डमा निर्भर रहने बताउँछन् । ‘अब बोर्डले धेरै पारिश्रमिक लिने प्रशिक्षक नियुक्त गर्ने वा नगर्ने निर्णयमा भर पर्छ । यदि तलबको कुरा मिल्यो भने पुरानै सर्टलिष्टबाट एक जना नियुक्त हुनेछन्’, उनले भने ।