एजेन्सी– ओपनर सूर्यकुमार यादवको उत्कृष्ट ब्याटिङमा भारतले तेस्रो टि२० आई खेलमा घरेलु टोली वेस्टइन्डिजलाई ७ विकेटले पराजित गरेको छ । योसँगै पाँच टि२० आई खेलको सिरिजमा भारतले २–१ को अग्रता लिएको छ ।

जितको लागि १ सय ६५ रनको विजयी लक्ष्य पछ्याएको भारतले १९ ओभरमा ३ विकेट गुमाउँदै पूरा गर्यो । भारतका सूर्यकुमार यादवले ४४ बलमा ८ चौका र ४ छक्कासहित ७६ रनको इनिङ खेले । विकेटकिपर ऋषभ पन्त २६ बलमा ३ चौका र १ छक्कासहित ३३ रनमा अविजित रहे ।

कप्तान रोहित शर्मा ११ रनमै रिटार्यट हर्ट भएका थिए । जुन समय भारतले १९ रन बनाएको थियो । दोस्रो विकेटका लागि श्रेयस ऐर र सूर्यले ८६ रनको साझेदारी गर्दै जितको आधार तय गरे । ऐरले २७ बलमा २ चौकासहित २४ रनमा आउट भए ।

हार्दिक पान्ड्या ४ रनमा आउट हुँदा दीपक हुडा १० रनमा अविजित रहे । वेस्टइन्डिजका जेसन होल्डर, डोमिनिक ड्रेक्स र अकिल हुुसैनले एक एक विकेट लिए ।

त्यसअघि सेन्ट किट्समा टस हारेर पहिला ब्याटिङको निम्तो पाएको वेस्टइन्डिजले निर्धारित २० ओभरमा ५ विकेट गुमाउँदै १ सय ६४ रन बनाएको थियो ।

वेस्टइन्डिजका ओपनर काइल मेयर्सले ५० बलमा ८ चौका र ४ छक्कासहित सर्वाधिक ७३ रन बनाए । उनको यो टि२० आई करिअरको दोस्रो र उच्च प्रदर्शन हो ।

रोभम्यान पावेलले १४ बलमा २ चौका र १ छक्कासहित २४ रनमा क्याच आउट भए । शिम्रन हेटमायर १२ बलमा २ छक्कासहित २० रनमा रन आउट भए ।

पहिलो विकेटका लागि मेयर्स र ब्रेन्डन किंगले ७.२ ओभरमा ५७ रन जोड्दै राम्रो सुरुवात दिलाएका थिए । किंग हार्दिक पान्ड्याको बलमा इनसाइड एज लागेर बोल्ड हुन पुगेका थिए । किंगले २० बलमा ३ चौकासहित २० रन बनाए ।

कप्तान निकोलस पुरन २३ बलमा २ चौका र १ छक्कासहित २२ रनमा आउट भए । भारतका भुवनेश्वर कुमारले ४ ओभरमा ३५ रन खर्चेर २ विकेट लिए । हार्दिक पान्ड्याले ४ ओभरमा १९ रन खर्चेर १ विकेट लिए ।

अर्शदीप सिंहले ४ ओभरमा ३३ रन खर्चेर १ विकेट लिए । पहिलो खेलमा भारत ६८ रनले विजयी हुँदा दोस्रो खेलमा ५ विकेटले पराजित भएको थियो । चौथो खेल शनिबार र पाँचौं तथा अन्तिम खेल आइतबार हुनेछ ।