एजेन्सी – अमेरिकाले आइसिसी विश्वकप लिग–२ त्रिकोणात्मक ओडिआई सिरिज अन्तर्गत घरेलु टोली स्कटल्यान्डमाथि दुई विकेटको रोमान्चक जित हात पारेको छ ।

जितको लागि २ सय ५० रनको विजयी लक्ष्य पछ्याएको अमेरिकाले ४९.५ ओभरमा ८ विकेट गुमाउँदै पूरा गर्यो । अमेरिकालाई जितको लागि अन्तिम ६ बलमा १५ रन चाहिँएको अवस्थामा जसकरण मल्होत्राले शफ्यान शरिफलाई एक छक्का र दुई चौका प्रहार गर्दै जित दिलाए ।

पहिलो बलमै मल्होत्राले शरिफलाई छक्का, दोस्रो डट, तेस्रो र चौथो लगातार चौका हाने । पाँचौं बलमा एक रन जोड्दै जित पक्का गराए । अमेरिकाका आरोन जोन्सले ८७ बलमा १ चौका र २ छक्कासहित सर्वाधिक ६२ रन बनाए । कप्तान मोनांक पटेलले ५७ बलमा २ चौका र १ छक्कासहित ५० रन बनाए ।

मल्होत्राले २५ बलमा ४ चौका र १ छक्कासहित ३६ रनमा अविजित रहे । ओपनर स्टिभन टेलर १६, सुशान्त मोदानी २८ र गजानन्द सिंह ३३ रनमा आउट भए । स्कटल्यान्डका गेभिन मेन, हम्जा ताहिर र माइकल लिस्कले दुई दुई विकेट लिए ।

त्यसअघि टस हारेर पहिला ब्याटिङको निम्तो पाएको स्कटल्यान्डले निर्धारित ५० ओभरमा ८ विकेट गुमाउँदै २ सय ४९ रन बनायो । स्कटल्यान्डका कलुम म्याकलेओडले १ सय ४४ बलमा १३ चौका र २ छक्कासहित सर्वाधिक १ सय ३३ रनको अविजित इनिङ खेले ।

उनको यो ओडिआई करिअरको १० औं शतक हो । स्कटल्यान्ड एक समय ३१-४ को अवस्थामा थियो । क्रिस ग्रिभ्स १४ रनमा आउट हुँदा ७३-५ को अवस्थामा पुगेको थियो । त्यो खराब स्थीतिबाट म्याकलेओडले बलियो अवस्थामा पुर्याएका थिए । म्याकलेओडले पछिल्ला चार इनिङमा क्रमश : ७६, १ सय १७, ७७ र १ सय ३३ रन बनाएका छन् ।

माइकल लिक्स ४१ र शफ्यान शरिफ २५ रनमा आउट भए । अमेरिकाका इयान होल्यान्डले १० ओभरमा १ मेडनसहित २८ रन खर्चेर ३ विकेट लिए । सौरभ नेत्रवालकर र स्टिभन टेलरले दुई दुई विकेट लिए ।

यो पनि पढ्नुहोस् : विश्वकप छनोटमा यस्तो छ नेपालको अवस्था

अंक तालिका

विश्वकप लिग–२ मा कुल १ सय २६ खेल हुनेछन् । हालसम्म १ सय २ खेल सकिएका छन् । ओमान पुरै ३६ खेल खेल्दै २१ मा जित र १३ मा हारका साथ ४४ अंक जोड्दै शीर्ष स्थानमा छ । स्कटल्यान्ड २८ खेलमा १९ मा जित र ७ मा हारका साथ ४० अंक जोड्दै दोस्रो स्थानमा छ । अमेरिका २८ खेलमा १३ मा जित र १३ मा हारका साथ २८ अंक जोड्दै तेस्रो स्थानमा छ ।

युएई २६ खेलमा १२ मा जित र ११ मा हारका साथ २७ अंक जोड्दै चौथो स्थानमा छ । नामिबिया १८ खेलमा ९ मा जित र ९ मा हारका साथ १८ अंक जोड्दै पाँचौं स्थानमा छ । नेपाल २० खेलमा ८ मा जित र ११ मा हारका साथ १७ अंक जोड्दै छैटौं स्थानमा छ । पपुवा न्युगिनी २० खेलमा १ मा जित र १९ मा हारका साथ पुछारमा छ । पपुवा न्युगिनी शीर्ष तीनको दौडबाट बाहिरी सकेको छ ।