चेन्नाई (एजेन्सी)– भारतीय क्रिकेट टोलीमा अहिले सम्मकै उत्कृष्ट बन्ने सम्भावना रहेको मुख्य प्रशिक्षक अनिल कुम्बलेले बताएका छन् । टेस्ट क्रिकेटको शीर्ष वरियतामा रहेको भारतले मंगलबार इङ्ल्यान्डलाई पाँचौं तथा अन्तिम टेस्टमा १ इनिङ र ७५ रनले हराएपछि कुम्बलेले यस्तो प्रतिक्रिया दिएका हुन् । मंगलबारको जितसँगै ५ टेस्टको श्रृखंलामा भारत ४–० ले विजयी भएको छ । पहिलो टेस्ट बराबरीमा टुंगिएको थियो ।
भारतीय टोलीले लगातार पाँचौं टेस्ट श्रृखंला जितेको छ भने टोलीको अपराजित यात्रा १७ खेल पुगेका छ । ‘यो टोली असाधारण छ’ उनले भने, ‘जितमा सबैको योगदान रह्यो । यो टोली साच्चै विशेष छ ।’
भारत पछिल्लो पटक सन् २०१५ को अगस्टमा श्रीलंकासँग पराजित भएको थियो । यद्दपी त्यो श्रृखंलामा पनि भारतले २–१ ले जितेको थियो । त्यसपछि भारतले दक्षिण अफ्रिका, न्यूजिल्यान्ड र इङ्ल्यान्डलाई घरेलु मैदानमा हराएको छ । त्यस्तै वेस्ट इन्डिजलाई उसकै मैदानमा हराएको थियो ।
यद्दपी भारत अझै केही कीर्तिमान भन्दा पछि नै छ । सबैभन्दा बढी अपराजित रहने कीर्तिमान भने वेस्ट इन्डिजको नाममा रहेको छ । १९८२ देखि १९८४ सम्म वेस्ट इन्डिज २७ खेलमा अपराजित रहेको थियो । त्यस्तै १९८४ देखि १९९२ सम्म इङ्ल्यान्डले र २००५ देखि २००८ सम्म अस्ट्रेलिया चार टेस्ट श्रृखंलाका जित्नुका साथै लागतार ९ खेल जितेका थिए।
यसपटकको जितले भारतले एकहद सम्म बदला पुरा गरेको छ । भारत २०१२ मा घरेलु मैदानमा र २०१४ मा भ्रमणका क्रममा इङ्ल्यान्डसँग पराजित भएको थियो । ‘विशेष खालको अनुभव भइरहेको ’ भारतीय टोलीका कप्तान विराट कोहलीले भने, ‘पछिल्लो पटक हामी इङ्ल्यान्डसँग यो मैदानमा हराएका थियो । हामीले त्यति बेला श्रृखंलामा पनि गुमाएका थियौं । त्यसैले पनि सम्भवत यो अहिले सम्मको सुखद क्षण मध्ये पर्दछ । पछिल्ला १५ महिलामा हामीले शीर्ष टोलीहरुलाई हराएका छौं, जुन टोलीसँग हामी पराजित भएका थियौं । यसपटक सबै चिज राम्रो भयो ।’
फलो अनमा परेको इङ्ल्यान्डले पाँचौ तथा अन्तिम दिन मंगलबारको खेल विना क्षेति १२ रनबाट खेल अघि बढाएको थियो । तर, एलेस्टर कुकको पुरै टोली २ सय ७ रनमा अलआउट भएको थियो । भारतीय अलराउन्डर रविन्द्र जडेजाले ७ विकेट लिए भने इशान्त शर्मा, उमेश यादव र अमित मिश्राले समान १ विकेट लिए ।
इङ्ल्यान्डका लागि केटोन जेनिङसले सबैभन्दा बढी ५४ रन बनाएका थिए । कप्तान कुलले ४९ , मोइन अलिले ४४ र बेन स्टोक्सले २३ रन बनाउनु बाहेक कुनैपनि खेलाडीले दोहोरो अंकमा रन बनाउन सकेनन् । इङ्ल्यान्डले पहिलो इनिङमा ४ सय ७७ रन बनाएको थियो ।
करुण नायरको अविजित तेहोरो शतक र लोकेश राहुलको १ सय ९९ रनको मद्दतमा भारतले ७ विकेटको क्षेतिमा ७ सय ५९ रन बनाउँदै पहिलो इनिङ समाप्तीको घोषणा गरेको थियो । नायर म्यान अफ दि म्याच र कप्तान कोहली म्यान अफ दी सिरिज घोषित भएका थिए ।
