काठमाडौं (हाम्रो खेलकुद) – नेपालमा ल्याएको आईसीसी पुरुष टि२० विश्वकप क्रिकेटको ट्रफी प्रदर्शनीका लागि बुधबार भक्तपुर दरबार स्क्वायरमा राखिएको छ । ट्रफी सोमबार नेपाल ल्याएको थियो ।

नेपाल क्रिकेट संघ (क्यान) ले विश्वकप ट्रफी बुधबार भक्तपुर दरबार स्क्वायरमा प्रदर्शनीका लागि राखेको हो । प्रदर्शनीमा राखिनु अघि ट्रफी दरबार क्षेत्र घुमाईएको थियो । विश्वकपको ट्रफीसँग विभिन्न स्कुलका विद्यार्थी, स्थानीय र पर्यटकले ट्रफीसँग तस्बिर खिचाएका थिए ।

नेपाल ल्याइएको ट्रफी मंगलबार सोलुखुम्बुको गोक्यो ताल र कालापत्थरमा लगिने भनिएपनि खराव मौसमका कारण ट्रफीलाई काठमाडौंको चन्द्रागिरिमा प्रदर्शनी गरिएको थियो । त्यसपछि ट्रफीलाई प्रधानमन्त्री कार्यलयमा लगिएको थियो । ट्रफी टुरमा नेपाली राष्ट्रिय टिमका पूर्व खेलाडी मेहबुब आलम, शरद भेषावकर, महिला टिमकी कप्तान रुबिना क्षेत्रीसँगै पूर्व कप्तान तथा क्यानका क्रिकेट म्यानेजर विनोद दास पनि सहभागी छन् ।

निसानसँग सहकार्य गरेर आइसीसीले ट्रफी विश्वभर भ्रमण गराउँदै आएको छ । ट्रफी खेलाडी तथा राष्ट्रप्रमुख बाहेक अन्यले छुन पाउँदैनन् । विश्वकपको एक सय दिन ट्रफी टुर अन्तर्गत ट्रफी नेपाल ल्याईएको हो । विश्वकपको ट्रफी १३ देशका ३५ स्थानमा पुर्याइने बताइएको छ ।

फिजि, फिनल्यान्ड, जमर्नी, घना, इन्डोनेसिया, जापान, नामिबिया, नेपाल, सिंगापुर, भनुआतुमा पहिलोपटक टि–२० विश्वकपको ट्रफी पुग्नेछ । सुरुवात जुलाई ८ देखि मेलबर्नबाट सुरु भएको हो । अक्टोबर १३ मा अष्ट्रेलियाको जिलङमा पुगेर सकिनेछ ।
टि–२० विश्वकपको ट्रफी नेपालमा पहिलो पटक आउन लागेको हो ।

यसअघि २०१९ मा इंग्ल्यान्डमा भएको एकदिवसिय विश्वकपको ट्रफी भने नेपालको काठमाडौं र पोखरा पुर्याएको थियो । टि –२० विश्वकप २०२२ अष्ट्रेलियामा १६ अक्टोबर देखि नोभेम्बर १३ सम्म हुनेछ । नेपाल गत फागुनमा आइसिसी टी– २० विश्वकप छनोट ए को पहिलो सेमिफाइनल खेलमा युएईसँग ६८ रनले पराजित हुँदै टि–२० विश्वकप खेल्ने अवसर गुमाएको थियो ।

ट्रफीसँग नेपाल आएका आईसीसी मार्केटिङ एण्ड कम्युनिकेसन प्रतिनिधि शोमेरेस सेट्टीले धेरै समर्थकको माझ पु¥याउने उद्देश्यका साथ यो ट्रफी टुर गरिएको बताएका थिए ।