काठमाडौंं (हाम्रो खेलकुद) – नेपालले पहिलो एकदिवसिय अभ्यास खेलमा घरेलु टोली केन्याविरुद्ध मध्यम बलिङ प्रदर्शन गरेको छ । नैरोबीमा रहेको जिमखाना क्लब ग्राउन्डमा टस जितेर पहिला ब्याटिङ थालेको केन्याले २८ ओभरमा ४ विकेट गुमाउँदै १ सय ९ रन बनाएको छ ।

केन्याका रकिप पटेल ३९ बलमा २ चौकासहित २३ रनमा अविजित छन् । कोलिन्स ओबुया ६६ बलमा ३ चौका र १ छक्कासहित ३५ रनमा अविजित छन् । पाँचौं विकेटका लागि लागि रकिप र ओबुयाले ६० रनको अविजित साझेदारी गरेका छन् ।

तीव्र गतिका बलर सोमपाल कामीले पहिलो ओभरको पाँचौं बलमा ओपनर सुखदीप सिंहलाई ५ रनमा कट एण्ड बोल्ड आउट गरे । करण केसीले चौथो ओभरको दोस्रो बलमा एलेक्स ओबान्डालाई शून्यमा विकेटकिपर अर्जुन साउदबाट क्याच गराए ।

नवौं ओभरको दोस्रो बलमा नेल्सनलाई सोमपालले दुई रनमा एलबीडब्लू आउट गरे । १३ औं ओभरको पाँचौं बलमा पवन सरार्फले इफरान करिमलाई ३० रनमा बोल्ड आउट गरे । करिमले ४१ बलमा ५ चौका र १ छक्का प्रहार गरे ।

सिरिज तीन खेलको एकदिवसिय अभ्यास खेल हुनेछ । तीन एकदिवसिय अभ्यास खेलमा नेपालको कप्तानी युवा ब्याटर रोहित पौडेलले गरेका छन् ।

सन्दीप लामिछाने भने टि२० आई सिरिजपछि क्यारेवियन प्रिमियर लिग (सिपिएल) खेल्न वेस्टइन्डिज गएका छन् । पाँच टि२० आई खेलको सिरिज नेपालले ३–२ ले जितेको थियो ।