एजेन्सी – नेपालले तेस्रो एकदिवसिय अभ्यास खेलमा घरेलु टोली केन्याविरुद्ध मध्यम बलिङ प्रदर्शन गरेको छ । जिमखाना क्लब मैदानमा टस जितेर पहिला ब्याटिङ थालेको केन्याले १८ ओभरमा १ विकेट गुमाउँदै ६७ रन बनाएको छ ।

केन्याका विकेटकिपर सुखदीप सिंह ५५ बलमा ४ चौकासहित ३३ रनमा अविजित छन् । कोलिन्स ओबुया ४७ बलमा ३ चौकासहित २६ रनमा अविजित छन् । सुखदीप र कोलिन्सले दोस्रो विकेटका लागि ५० रनको साझेदारी गरेका छन् ।
ओपनर नेल्सन ४ रनमा रन आउट भए । दीपेन्द्रसिंह ऐरीले चौथो ओभरको तेस्रो बलमा मिडअनबाट रन आउट गराएका थिए ।

नेपालले आजको खेलमा करण केसीलाई विश्रमा दिएको छ । करणको स्थाना नेपालले किशोर महतोलाई मौका दिएको छ । त्यस्तै पवन सरार्फको स्थानमा आसिफ शेखलाई मौका दिएको छ ।

एक खेल अगावै सिरिज जितेको नेपाल क्लिनस्विप गर्ने सोचमा हुनेछ । केन्या अन्तिम खेलमा जितका साथ सिरिजमा क्लिनस्विप हुनबाट बच्न चाहन्छ । नेपाल पहिलो खेलमा ७ विकेट र दोस्रो खेलमा १७ रनले विजयी भएको थियो ।

नेपालले केन्यासँगको पाँच टि२० आई सिरिज भने ३–२ ले जितेको थियो । टि२० आई सिरिजपछि सन्दीप लामिछाने भने क्यारेवियन प्रिमियर लिग (सिपिएल) खेल्न वेस्टइन्डिज गएका छन् । त्यसैको कारण उपकप्तान रोहित पौडेलले एकदिवसिय अभ्यास खेलमा नेपालको कप्तानी गरेका छन् ।