एजेन्सी – अफगानिस्तानले टि२० एसिया २०२२ को सुपर फोरमा फाइनलमा पुग्न पाकिस्तानलाई १ सय ३० रनको मध्यम लक्ष्य दिएको छ । शारजाहमा टस हारेर पहिला ब्याटिङ थालेको अफगानिस्तानले निर्धारित २० ओभरमा ६ विकेट गुमाउँदै १ सय २९ रन बनायो ।

अफगानिस्तानका इब्राहिम जद्रानले ३७ बलमा २ चौका र १ छक्कासहित सर्वाधिक ३५ रन बनाए । अफगानिस्तानले सुरुवात भने राम्रो गरेको थियो । पहिलो विकेटका लागि हज्रातुल्लाह जजाई र रहमानुल्लाह गुरबाजले ३.५ ओभरमा ३६ रनको साझेदारी गर्दै राम्रो सुरुवात दिलाएका थिए । हरिस रौफले गुरबाजलाई १७ रनमा बोल्ड गर्दै पहिलो सफलता दिलाए ।

उनले ११ बलमा २ छक्का हाने । अर्को ओभरमा जजाईलाई मोहम्मद हसनैनले २१ रनमा बोल्ड गरे । जजाईले १७ बलमा ४ चौका प्रहार गरे । त्यसपछि अफगानिस्तान खेलमा फर्किन सकेन । करिम जन्नत १५, नाजिबुल्लाह जद्रान १० र मोहम्मद नाबी शून्यमा आउट भए ।

राशिद खान १५ बलमा २ चौका र १ छक्कासहित १८ रनमा अविजित रहे । पाकिस्तानका हरिस रौफले ४ ओभरमा २६ रन खर्चेर सर्वाधिक २ विकेट लिए । मोहम्मद नवाजले ४ ओभरमा २३ रन खर्चेर १ विकेट लिए । शादब खानले ४ ओभरमा २७ रन खर्चेर १ विकेट लिए । मोहम्मद हसनैनले ४ ओभरमा ३४ रन खर्चेर १ विकेट लिए । नसिम शाहले ४ ओभरमा १९ रन खर्चेर १ विकेट लिए ।

पाकिस्तान यस खेलमा विजयी हुँदा फाइनलमा पुग्नेछ । पाकिस्तानको जितले श्रीलंका पनि फाइनलमा पुग्ने हुँदा अफगानिस्तान र भारत भने बाहिरिनेछन् । भारत सुपर फोरमा पाकिस्तानसँग ५ विकेट र श्रीलंकासँग ६ विकेटले पराजित भएपछि फाइनलको सम्भावना झिनो अंक गणीतिय मात्र बाँकी छ । भारत पाकिस्तानको दुबै हार चाहन्छ ।