काठमाडौं (हाम्रो खेलकुद) – वर्षाको कारण आजदेखि सुरु भएको नवौं राष्ट्रिय खेलकुद अन्तर्गत क्रिकेट प्रतियोगितामा पहिलो दिन तीन खेल रद्ध भएका छन् । चार मध्य तीन खेलमा रद्ध भएपछि सबै टोलीले एक एक अंक बाँडेका छन् ।

पहिलो खेलमा टियु मैदानमा एनआरएनए एकेडेमीले सुदूरपश्चिम प्रदेशलाई १२ रनले हराएको थियो । वर्षाको कारण खेल ६–६ ओभरमा झारिएको थियो । टियुमै दोस्रो खेलमा बागमती प्रदेश र प्रदेश–१ बीच टस पनि हुन नपाई रद्ध भयो ।

उता मुलपानीमा भने विहान देखिनै खेल्न योग्य रहेन । पहिलो खेलमा मधेश प्रदेश र गण्डकी प्रदेशले अंक बाँडे । दोस्रो खेलमा लुम्बिनी प्रदेश र कर्णाली प्रदेशले पनि वर्षाको कारण अंक बाँडे । दुबै खेल टस पनि हुन नपाई अंक बाँड्नु परेको थियो ।

शुक्रबार पनि चार खेल हुनेछन् । तर मुलपानीमा भने बिहीबारको वर्षाले नै खेल हुनेमा शंका छ । शुक्रबार मुलपानीमा पहिलो खेल नेपाल पुलिस क्लब र मधेश प्रदेशबीच हुनेछ । दोस्रो खेलमा त्रिभुवन आर्मी क्लब र कर्णालीबीच हुनेछ । यता शुक्रबार टियुमा एनआरएनए र एपिएफबीच पहिलो खेल हुनेछ । दोस्रो खेलमा सुदूरपश्चिम र बागमती प्रदेशबीच हुनेछ ।

समूह ए मा मधेश प्रदेश, लुम्बिनी प्रदेश, कर्णाली प्रदेश, नेपाल पुलिस क्लब, त्रिभुवन आर्मी क्लब र गण्डकी प्रदेश हुनेछन् । समूह बी मा एनआरएनए नेपाल, सुदूरपश्चिम प्रदेश, बागमती प्रदेश, प्रदेश नम्बर १ र नेपाल एपिएफ क्लब छन् । शीर्ष दुई दुई टोली सेमिफाइनलमा पुग्नेछन् । सेमिफाइनल भदौ ३० र फाइनल भदौ ३१ मा हुनेछ ।