भुपेन्द्र जिसी, काठमाडौं

नेपाली क्रिकेटमा चोटपछि पुनरागमन गर्न धेरै कठिन छ । समयमै स्तरीय उपचार नपाउँदा र उपचार भएपनि फर्कने अवसर नहुँदा खेलाडीलाई चोट अभिसाप नै बन्दै आएको छ । चोटपछि निकै कम खेलाडीले समयमा पुनरागमन गर्ने अवसर पाउँछन् । अझ घरेलु प्रतियोगिताको अवस्था दयनीय हुँदा अधिकांश खेलाडी फर्कन नै पाउँदैनन् । चोटले नै करिअरमा पूर्णविराम लगाउँछ ।

नेपाली क्रिकेट टोलीका अलराउन्डर सागर पुनले झण्डै चार वर्षपछि घरेलु क्रिकेटमा पुनरागमन गरेका छन् । सन् २०१८ को डिसेम्बरमा एभरेष्ट प्रिमियर लिगमा काठमाडौं किंग्स इलेभेनबाट ललितपुर प्याट्रियट्सविरुद्ध खेल्ने क्रममा सागरको खुट्टामा चोट लागेको थियो । सागरले शल्यक्रिया गराउनुपर्ने भएपछि लामो समय मैदानबाहिर रहने पक्का थियो । चोट र त्यसपछि खेलको कमी भएपछि सागरले अमेरिका जाने निर्णय लिए ।

झन्डै ३ वर्ष अमेरिका बसेका सागर नेपाली क्रिकेटबाट गुमनाम नै रहे । अमेरिकामा आफैं प्रशिक्षण गर्दै आएका सागरले काठमाडौंमा जारी नवौं राष्ट्रिय खेलकुद अन्तर्गत ३४ औं क्रिकेट प्रतियोगितामा एनआरएनए नेपालबाट घरेलु क्रिकेटमा पुनरागमन गरेका छन् ।

एनआरएनएले पहिलो पटक नेपाली घरेलु क्रिकेटमा खेल्ने भएपछि उनले पुनरागमनको अवसर पाएका हुन् । अन्यथा उनले कहिले अवसर पाउँथे भन्न सक्ने अवस्था थिएन । सम्भवत उनको लागि नेपाली क्रिकेटमा फर्कने बाटो बन्द थियो । फर्किहाले पनि त्रिभुवन आर्मी क्लब छाडिसकेको हुँदा उनी अब कहाँबाट खेल्छन् भन्न सक्ने अवस्था थिएन । सागर आफैं पनि यो स्वीकार्छन् ।

‘अमेरिकाबाट आएर मैले भैरहवा वा आर्मीबाट खेल्न त मौका पाउदिन थिएँ । मलाई अवसर चाहिएको थियो । जसरि हुन्छ खेल्नु थियो । एनआरएनएले मलाई अवसर दिनुभयो । त्यसको लागि म खुसी छु र धन्यवाद दिन चाहन्छु,’ सागरले भने ।

एनआरएनएबाट खेल्दै सागरले पहिलो खेलमै सुदूरपश्चिम प्रदेशविरुद्ध १९ बलमा ३ चौका र ३ छक्कासहित ४६ रनको आक्रामक इनिङ खेल्दै प्लेयर अफ द म्याच चुनिए । वर्षाको कारण मात्र ६ ओभरको खेल हुँदा एनआरएनएले ४ विकेट गुमाउँदै ७४ रन बनाएको थियो ।

दोस्रो खेलमा भने सागर नेपाल एपिएफ क्लबसँग ६ रनमा आउट भए । सागर आफू खेल्ने अवसरको पर्खाइमा नै रहेको बताउँछन् । ‘पुनरागमन गर्न पाउँदा एकदमै खुसी लाग्यो । दुई तीन वर्षदेखि म पूनरागमन गर्न खोजिरहेको थिएँ । त्यसको लागि म एउटा मौकाको पर्खाईमा थिएँ । त्यसैले यो नवौं राष्ट्रिय प्रतियोगिता खेल्न पाउँदा एकदमै खुसी लागेको छ’, सागरले भने ।

‘म विगतको सबै कुराहरु बिर्सेस नयाँ सुरुवात गर्न प्रयास गरिरहेको छु । टिमको लागि योगदान दिन पाउँदा धेरै खुसी लागेको छ’, सागरले सुदूरविरुद्ध खेलपछि भने ।

‘म लामो समयदेखि खेल्दै आएको खेलाडी हुँ । तर दुई तीन वर्ष बाहिर हुँदा त कसरी खेल्न पाउँ भन्ने नै थियो । अरु त पछिको कुरा हो । म कसरी खेल्न पाइन्छ भनेर बसेको थिएँ । भाग्यले यो प्रतियोगिता खेल्न पाएँ’, उनले थपे ।

सागरले पहिलो खेलमै आक्रामक ब्याटिङ गरे । त्यसले उनीमा क्रिकेटको भोक देखिन्छ । वर्षाको कारण भने उनले केहि असहज महसुस गरेका थिए । सागर ६ ओभरको खेल हुँदा मात्र ब्याट्सम्यानले मात्र खेल्नुपर्ने थियो ।

‘सबै खेलाडीहरुले राम्रो गरेको थियो । यहाँ आउने भनेको नै जित्नलाई आउने हो । यसैपनि धेरै पछि खेल्ने मौका पाएको छु । मलाई विश्वास गरेर अघि पनि खेल्न पाए । राम्रो भयो र खुसी लाग्यो’, सागरले भने ।

सागर पुनरागमन भन्दापनि कसरी खेल्ने अवसर खोजेको बताउँछन् । ‘मुख्य कुरा पुनरागमन भन्दापनि जसरि हुन्छ मलाई खेल्ने वातावरण चाहिएको थियो । यहाँ नवौं राष्ट्रियले कताबाट जुरायो । म आफ्नो तर्फबाट तयारी गरेको थिएँ,’ उनले भने । सागर अमेरिकामा पनि खाली समयमा फिटनेस देखि क्रिकेट खेल्दै आएका छन् ।

सागर चोटको समयपछि खेलाडीलाई साथदिनु पर्ने बताउँछन् । तर सागरले आफूले चोटपछि कसैको साथ नपाएको बताउँछन् । ‘एउटा खेलाडीले राष्ट्रिय टोलीबाट योगदान दिइरहेको छ । घाइते भएपछि त्यो समयमा कोही साथ दिने मान्छे चाहिन्छ । तर मैले त्यो समयमा कोहि पनि पाइनँ । कसैले पनि के कस्तो भयो भनेर आएर सोधेनन् । त्यसले पनि मलाई अलि डाउन गरायो ।’

‘कोही घाइते हुनुन्छ भने हौसला दिनुपर्छ । एउटा राम्रो खेलाडी यसै गुम्न दिनु हुँदैन । उसले आफ्नो खुन पसिना क्रिकेटलाई दिइरहेको छ नि । घाइते भएपछि कसरी पुनरागमन गर्ने भन्ने नै सोच्नुपर्यो भने राम्रो खेलाडीहरु आएर कसरि प्रदर्शन गर्न सक्छन्?’, उनले निराश हुँदै प्रश्न गरे ।

सागर नेपाली क्रिकेटले पाएको एक उत्कृष्ट अलराउन्डर मध्यमा पर्छन् । सागर खेलाडीको रुपमा कसरी योगदान दिनसक्छु भन्ने ठूलो कुरा रहेको बताउँछन् । ‘मैले प्रदर्शन गरेपनि राष्ट्रिय टोलीमा फर्कन्छु भन्दानपनि मैले जुन टोलीबाट खेलेको छु अहिले त्यसलाई नै सोचिरहेको छु । मैले माथिको लेभलको पनि सोचेको छैन । मैले एनआरएनएको टोलीबाट खेलेको छु । एनआरएनलाई कसरी माथिल्लो स्तरमा पुर्याउन र आफूले कसरी राम्रो गर्ने भन्नेतर्फ केन्द्रित छु’, सागरले भने ।

१५ दिनपछि नेपालमा नेपाल टि२० लिग हुँदैछ । नवौंमा राम्रो गर्दै नेपाल टि२० लिग खेल्ने सागरलाई राम्रो अवसर हुनसक्छ । ‘राम्रो खेल्नुपर्यो । मौका आउँछ । आफूले प्रदर्शन गरेपछि छनोट भएपनि ठिक छ । नत्र चलि रहन्छ’, सागरले नेपाल टि२० बारे भने ।

सागर सुरुमा एनआरएनएबाट खेल्न नेपाल आउँदा सुरुमा अरुले के सोच्ने हुन् भन्नेबारे चिन्ता लिएको बताउँछन् । सागरले घरेलु क्रिकेट भने त्रिभुवन आर्मी क्लबबाट खेल्ने गर्दर्थे । ‘म सुरुमा आउँदा कसले के भन्नुहुन्छ भन्ने लागेको थियो । सबै जना फरक फरक देशबाट आउनु भएको छ । त्यसपछि बिस्तारै खेल्ने हो । जसरी हुन्छ खेल्ने भन्ने हो । म सिधैं आएर आर्मी वा भैरहवा (लुम्बिनी) बाट खेल्नु भनेर मौका त पाउँदैन । म त एउटा अवसर खोजेको थिएँ । जहाँबाट खेलेपनि खेल्ने नै हो । एनआरएनएले मौका दिनु भयो । म वहाँहरुलाई धन्यावाद दिन चाहन्छु’, सागरले भने ।

सागरले भनेजस्तै नवौं उनलाई क्रिकेटमा फर्कने राम्रो अवसर बन्न सक्छ । उनलाई यसपछि नेपाल टि२० हुँदै सिनियर टोली सम्म फर्कन सम्भावनाको ढोका खुल्ला छ । त्यसको लागि भने सागरले उत्कृष्ट प्रदर्शन गर्नुपर्छ । अर्कोतर्फ क्यानले खेलाडी घाइते भएपछि राम्रो उपचार र पुनरागमनको आधार बनाइदिनुपर्छ भन्ने विषय फेरी एकपटक चर्चा गर्न जरुरि छ । सागर त एनआरएनएको कारण घरेलु क्रिकेटमा फर्किन पाए । तर अन्यले यस्तो अवसर नपाउन सक्छन् । कम्तिमा खेलाडीले घरेलु प्रतियोगितामा आफूले प्रदर्शन देखाउन पाउनुपर्छ ।