एजेन्सी – आइसिसी विश्वकप लिग–२ मा अमेरिका र पपुवा न्युगिनीबीचको खेल टाई भएको छ । जितको लागि २ सय ६ रनको विजयी लक्ष्य पछ्याएको पपुवा न्युगिनी ४९.५ ओभरमा २ सय ५ रनमै अल आउट भएपछि खेल टाई भएको हो ।

जितको लागि अन्तिम ६ बलमा पपुवा न्युगिनीलाई तीन रन चाहिँएपनि बनाउन नसकेपछि टाई भएको हो । हातमा दुई विकेट हुँदा पनि खेल गुमाएको हो । नाशुतोष केन्जिगेले पहिलो बलमै चाद सोपरलाई आउट गरे ।

त्यसपछि थप दुई बलमा एक एक रन खर्चिए । चौथो बल डट राखे । पाँचौं बलमा सिमो किमालाई आउट गर्दै खेल टाई गरे ।

पपुवा न्युगिनीका सेसे बाउले ९६ बलमा ३ चौका र १ छक्कासहित सर्वाधिक ७० रनको योगदान दिए । असाद भालाले ५२ बलमा ३ चौका र १ छक्कासहित ४० रनमा आउट भए । अन्यले राम्रो प्रदर्शन गर्न सकेनन् । अमेरिकाका सौरभ नेत्रवालकर, नाषुतोश केन्जिगे र स्टिभ टेलरले दुई दुई विकेट लिए ।

त्यसअघि पपुवा न्युगिनीले घरेलु मैदानमा टस जितेर अमिनी पार्कमा अमेरिकालाई ब्याटिङको निम्तो दिएको थियो । अमेरिका ४७ ओभरमा २ सय ५ रनमा अल आउट भयो ।

अमेरिकाका गजानन्द सिंहले ९० बलमा ५ चौका र १ छक्कासहित सर्वाधिक ५८ रन बनाए । जसकरण मल्होत्राले ४४ बलमा ८ चौका र १ छक्कासहित ५३ रन बनाए । अन्यले भने राम्रो प्रदर्शन गर्न सकेनन् ।

पपुवा न्युगिनीका सिमो किमाले ७ ओभरमा ३६ रन खर्चेर ३ विकेट लिए । चाद सोपर र दामिनी राभुले दुई दुई विकेट लिए ।