काठमाडौैं (हाम्रो खेलकुद) – नेपाल पुलिस क्लबका ओपनर कुशल भुर्तेलले नवौं राष्ट्रिय खेलकुद अन्तर्गत क्रिकेट प्रतियोगितामा लुम्बिनी प्रदेशविरुद्ध विष्फोटक अर्धशतक हानेका छन् ।

टियु क्रिकेट मैदानमा टस जितेर पहिला ब्याटिङ थालेको पुलिसले ७ ओभरमा कुनै विकेट नगुमाई ७७ रन बनाएको छ । ओपनर कुशल भुर्तेल २६ बलमा ६ चौका र ४ छक्कासहित ५८ रनमा अविजित छन् । भुर्तेलले सातौं ओभरको पहिलो बलमा तीव्र गतिका बलर नर सार्कीलाई चौका हान्दै २३ बलमा अर्धशतक हानेका थिए । सुनिल धमला १६ बलमा २ चौकासहित १७ रनमा अविजित छन् ।

पहिलो खेलमा कर्णालीविरुद्ध कुशल ४० बलमा ५ चौका र १ छक्कासहित ३९ रनमा अविजित रहे । कर्णालीविरुद्ध धमलाले आक्रामक ब्याटिङ गदै २४ बलमा ४४ रन जोडेका थिए । यस खेलमा धमला संयमित हुँदा कुशलले आक्रामक सुरुवात गरेका छन् ।

कुशलले पाँचौं ओभरको दोस्रो, तेस्रो र चौथो बलमा कप्तान कृष्ण कार्कीलाई लगातार तीन चौका हानेका थिए । त्यसअघिको ओभरमा बसिर अहमदलाई दुई छक्का र एक चौका हानेका थिए । आजको खेलमा पुलिसले मञ्जित श्रेष्ठलाई बेन्चमा राखेको छ । मञ्जित राष्ट्रिय प्रतियोगितामा पहिलो पटक बेन्चमा बसेका हुन् । दीपेन्द्रसिंह ऐरीले पहिलो पटक पुलिसको कप्तानी गरेका छन् ।