एजेन्सी – तीव्र गतिका बलर ओली रोविन्सनको उत्कृष्ट बलिङमा इंग्ल्यान्डले तेस्रो टेस्ट खेलमा दक्षिण अफ्रिकालाई ९ विकेटले हराउँदै सिरिज जितेको छ । घरेलु टोली इंग्ल्यान्डले पहिलो खेल गुमाएपनि त्यसपछि लगतार दुई खेल जित्दै सिरिज २-१ ले जितेको हो ।

जितको लागि १ सय ३० रनको सामान्य लक्ष्य पाएको इंग्ल्यान्डले २२.३ ओभरमा १ विकेट गुमाउँदै पूरा गर्यो । इंग्ल्यान्डका ओपनर ज्याक क्रली ५७ बलमा १२ चौकासहित ६९ रनमा अविजित रहे । एलेक्स लेक्स ७३ बलमा ४ चौका ३९ रनमा आउट भए । ओली पोप ११ रनमा अविजित रहे ।

दक्षिण अफ्रिका दोस्रो इनिङमा १ सय ६९ रनमा अल आउट भयो । दक्षिण अफ्रिकाका ओपनर डिएन एल्गर ५९ बलमा ६ चौकासहित सर्वाधिक ३६ रनमा आउट भए । सारेल एर्वी २६, किगन पिटरसन २३, वियान मुल्डर १४ र केशव महाराज १८ रनमा आउट भए । इंग्ल्यान्डका स्टुअर्ट ब्रोड र बेन स्टोक्स तीन तीन विकेट लिए । जेम्श एन्डरसन र ओली रोविन्सनले दुई दुई विकेट लिए ।

इंग्ल्यान्ड पहिलो इनिङमा १ सय ५८ रनमा अल आउट हुँदै ४० रनको अग्रता लिएको थियो । इंग्ल्यान्डका ओली पोपले ७७ बलमा १३ चौकासहित सर्वाधिक ६७ रन बनाए । जो रुट २३, बेन स्टोक्स १४ र ह्यारी ब्रुक्सले १२ रन बनाए । दक्षिण अफ्रिकाका मार्को यानसनले सर्वाधिक पाँच विकेट लिए । कागिसो रबाडाले चार विकेट लिए ।

त्यसअघि दक्षिण अफ्रिकाले द ओभलमा टस हारेर पहिला ब्याटिङ थालेको दक्षिण अफ्रिका ३६.२ ओभरमा १ सय १८ रनमा अल आउट भयो । दक्षिण अफ्रिकाका मार्को यानसनले ५९ बलमा ४ चौकासहिन सर्वाधिक ३० रनमा आउट भए । अन्यले भने राम्रो प्रदर्शन गर्न सकेनन् ।

इंग्ल्यान्डका ओली रोविन्सनले १४ ओभरमा ३ मेडनसहित ४९ रन खर्चेर सर्वाधिक पाँच विकेट लिए । स्टुअर्ट ब्रोडले चार र जेम्स एन्डरसनले एक विकेट लिए ।

ओली रोविन्सन खेलको प्लेपर अफ द म्याच चुनिए । कप्तान बेन स्टोक्स प्लेयर अफ द सिरिज चुनिए । इंग्ल्यान्ड पहिलो टेस्टमा १२ रनको इनिङ अन्तरले पराजित भएको थियो । दोस्रो टेस्ट खेलमा इंग्ल्यान्डले दक्षिण अफ्रिकालाई ८५ रनको इनिङ अन्तरले पराजित गरेको थियो ।

इंग्ल्यान्ड अव ७ टि२० आई खेलको सिरिज खेल्न पाकिस्तान भ्रमण गर्नेछ । पाकिस्तान र इंग्ल्यान्डबीचको पहिलो टि२० आई खेल २० सेप्टेम्बरमा हुनेछ । इंग्ल्यान्डले भारत भ्रमण गर्नेछ । तीन टि२० आई सिरिज अन्तर्गत पहिलो खेल २८ सेप्टेम्बरदेखि सुरुहुनेछ । भारत र दक्षिण अफ्रिकाबीच तीन ओडिआई खेलको सिरिज पनि हुनेछ ।