काठमाडौं (हाम्रो खेलकुद) – कर्णाली प्रदेशले नवौं राष्ट्रिय खेलकुद अन्तर्गत ३४ औं क्रिकेट प्रतियोगितामा मधेश प्रदेशमाथि तीन रनको रोमान्चक जित हात पारेको छ । सानदार बलिङका साथ कर्णालीले पहिलो जित निकाल्दै सेमिफाइनलको सम्भावना कायमै राख्दा मधेश प्रदेश भने बाहिरिएको छ ।

जितको लागि १ सय १५ रनको विजयी लक्ष्य पछ्याएको मधेश प्रदेश निर्धारित २० ओभरमा ९ विकेट गुमाउँदै १ सय ११ रन बनायो । अन्तिम ओभरमा मधेश प्रदेशलाई १९ रन चाहिँएपनि कप्तान रविन्द्रजंग शाहीले १५ रन खर्चिदै जितको आधार तय गरे । पहिलो बलमै हरिशंकर शाह प्रकाश जैशीबाट आउट भएपछि मधेश प्रदेशको जितको सम्भावना टाढिएको थियो ।

कर्णालीले मधेश प्रदेशलाई राष्ट्रिय प्रतियोगितामा पहिलो पटक हराएको थियो । हरिशंकर शाहले ४२ बलमा ३ चौका र १ छक्कासहित सर्वाधिक ४८ रन बनाए । अन्तिम बलमा राकेश कमातले दुई लगातार छक्का हानेपनि त्यो जितको लागि पर्याप्त थिएन । राकेश कमात ८ बलमा २ छक्कासहित १९ रनमा अविजित रहे ।

ओपनर सन्तोष कार्की पहिलो ओभरको चोथो बलमै आउट भए । तीव्र गतिका बलर अनुज चनारालाई पेभेलिएनतर्फको एण्डमा छक्का हान्न खोजेपनि एज लागेर मिडअनमा अनुज घर्तीले उत्कृष्ट क्याच लिँदै पेभेलिएन फर्काएका थिए ।

त्यसपछि तीव्र गतिका बलर दिनेश अधिकारीले मधेश प्रदेशका प्रमुख तीन विकेट लिँदै समस्यामा पारेका थिए । दिनेशको पाँचौं ओभरको दोस्रो बलमा कप्तान हसिम अन्सराीलाई विकेटकिपर विपिन रावलबाट ८ रनमा क्याच गराए । दीनेशकै बलमा विशाल शुश्लिङ एज लागेर रावलबाट २ क्याच हुन पुगे ।

दीनेशले नवौं ओभरको पहिलो बलमा युवा ब्याटर तृथ राज दासलाई एक रनमा रावलबाटनै क्याच गराउँदै पेभेलिएन फर्काएपछि ५०–४ को अवस्थामा पुगेको थियो । स्पिनर दिवान पुनले दशौं ओभरको दोस्रो बलमा मधेश प्रदेशका प्रमुख ब्याटर आदिल अन्सारीलाई दुई रनमा एलबीडब्लू आउट गरेपछि ५४–५ को कमजोर अवस्थामा पुगेको थियो ।

दिवान पुनै बमा ठूलो सट खेलेका युवा ब्याटर रोहन बिक विपिन शाहीबाट १० रनमा क्याच भएपछि मधेश प्रदेश १३.४ ओभरमा ७६/६ को अवस्थामा पुगेको थियो । त्यो समय मधेश प्रदेशलाई अन्तिम ३८ बलमा ३८ रन चाहिँएको थियो ।

रविन्द्रजंगको १७ औं ओभरको अन्तिम बलमा नविन यादव डिपमिडविकेटमा प्रकाश जैसीले विकेट लिएपछि अन्तिम १८ बलमा २८ रन चाहिँएको थियो । नविनले लगातार तीन डट बल डट खाएपछि दबाबमा ठूलो सट हान्दा क्याच भए ।

प्रकाश जैशीको १८ औं ओभरको तेस्रो बलमा लङअनमा विपिन विक्रम शाहीले ड्राइभ हान्दै रुपेश सिंहको उत्कृष्ट क्याच लिएपछि जित कर्णालीतर्फ मोडिएको थियो । त्यस ओभरमा प्रकाशले दुई रन मात्र दिएपछि अन्तिम १२ बलमा २६ रन चाहिँएको थियो । अनुज चनाराले १९ औं ओभरमा ७ रन मात्र खर्चिए । अन्तिम ६ बलमा १९ रन मेधश प्रदेशलाई चाहिँएको थियो ।

कर्णालीका दीनेश अधिकारीले ४ ओभरमा १६ रन खर्चेर ३ विकेट लिए । दिवान पुनले ४ ओभरमा १६ रन खर्चेर २ विकेट लिए । कप्तान रविन्द्रजंग शाहीले ४ ओभरमा २४ रन खर्चेर २ विकेट लिए । अनुज चनारा र प्रकाश जैशीले एक एक किकेट लिए ।

त्यसअघि टियु क्रिकेट मैदानमा टस हारेर पहिला ब्याटिङ थालेको कर्णालीले निर्धारित २० ओभरमा १ सय १४ रनमा अल आउट भएको थियो । कर्णालीका ओपनर विपिन रावलले २५ बलमा २ चौका र १ छक्कासहित सर्वाधिक २५ रनमा बनाए । प्रकाश जैशीले २१ बलमा २ चौकासहित १९ रन बनाए । दिनेश अधिकारीले १४ बलमा १ चौका र १ छक्का प्रहार गरे । अन्य ब्याटरले राम्रो प्रदर्शन गर्न सकेनन् ।

कर्णालीको सुरुवात भने राम्रो थियो । इनिङको पहिलो बलमै विपिन रावलले जितेन्द्र यादवलाई छक्का हान्दै खेलको सुरुवात गराएका थिए । आदिलले दोस्रो ओभरको तेस्रो बलमा निश्चल रावलाई विशाल शुश्लिङबाट क्याच गराउँदै पहिलो सफलता दिलाए । एक समय कर्णाली ७ ओभरमा ४३–१ को अवस्थामा थियो । त्यसपछि भने लगतार विकेट गुमाएको थियो ।

संघर्ष गरेका कप्तान रविन्द्रजंग शाही बायाँ हाते पार्टटाइम स्पिनर रवि शाहको बलमा १० रनमा कट एण्ड बोल्ड आउट भए । शाहीले १९ बल खेलेका थिए । हरिशंकर शाहको बलमा ओपनर विपिन रावल कभरमा राकेश कामतबाट क्याच भएपछि कर्णाली ५१–४ को अवस्थामा पुगेको थियो ।

कर्णालीबाट पहिलो खेल खेलेका विपिन शाही चोभारतर्फ एण्डमा लङअनमा छक्का हान्ने धुनमा रुपेश सिंहलाई क्याच दिन पुगे । स्पिनर नविन यादवको बलमा आउट भएका शाहीले १५ बल खेल्दै ८ रन जोडे । त्यसपछि आदिल अन्सारीले १६ औं ओभरमा तीन विकेट लिँदै दुई रन खर्चिए ।

दोस्रो बलमा आदिलले सुबोध ऐरलाई पाँच रनमा तृथ दासबाट ५ रनमा क्याच आउट गराए । पाँचौं बलमा प्रकाश जैशी तृथबाटै क्याच आउट भए । अन्तिम बलान दिवान पुनलाई शून्यमा बोल्ड गरे । आदिलले १९ औं ओभरको चौथो बलमा दिनेश अधिकारीलाई सट मिडविकेटमा नविन यादवबाट क्याच गराउँदै आदिलले आफ्नो पाँच विकेट पूरा गरे ।

आदिलले राष्ट्रिय प्रतियोगितामा पहिलो पटक पाँच विकेट लिएका हुन् । मधेशका आदिल अन्सारीले ४ ओभरमा १४ रन खर्चेर ५ विकेट लिए । हरिशंकर शाहले ४ ओभरमा ८ रन खर्चेर २ विकेट लिए । विशाल शुश्लिङ र नविन यादवले एक एक विकेट लिए ।

समूह ए मा मधेश प्रदेश, कर्णाली, त्रिभुवन आर्मी क्लब, नेपाल पुलिस क्लब, गण्डकी प्रदेश र लुम्बिनी प्रदेश छन् । समूह बी मा एनआरएनए नेपाल, बागमती प्रदेश, सुदूरपश्चिम प्रदेश, प्रदेश १ र नेपाल एपिएफ क्लब छन् ।

कर्णाली ४ खेलमा १ मा जित, १ मा हार र २ अंक बाँड्दै ४ अंक जोडेको छ । अन्तिम खेलमा गण्डकीले कर्णालीसँग बुधबार खेल्नेछ । उक्त खेल जितेको अवस्थामा कर्णाली ६ अंकका साथ सेमिफाइनल खेल्ने सम्भावना छ । यता मधेश प्रदेश भने ५ खेलमा २ मा हार, ३ खेलमा अंक बाँड्दै बाहिरिएको छ ।