काठमाडौं (हाम्रो खेलकुद) – विनोद भण्डारी नेपाली क्रिकेटका उत्कृष्ट विकेटकिपर तथा आक्रामक ब्याट्सम्यान हुन् । अन्तर्राष्ट्रिय क्रिकेटमा पछिल्लो समय ब्याटबाट अपेक्षा अनुसार प्रदर्शन हुन नसकेपनि किपरको भूमिकामा अब्बल मानिन्छन् ।

घरेलु क्रिकेटमा जमेका विनोदबाट अन्तर्राष्ट्रिय क्रिकेटमा त्यसै अनुरुप अपेक्षा भएपनि प्रदर्शन ठिक विपरित छ । त्यसैले उनको आलोचना हुने गर्दछ । आलोचना त्यसको हुन्छ जसबाट उच्च अपेक्षा गरिएको हुन्छ । विनोदले यो सहज रुपमा स्वीकार पनि गर्दै आएका छन् । जुन एउटा असल खेलाडीको रुपमा हुनुपर्ने गुण हो ।

नेपाली क्रिकेटकै घरेलु मैदान रहेको टियु क्रिकेट मैदानमा भने विनोदको प्रदर्शन सधैंजसो उत्कृष्ट रहने गर्दछ । झण्डै डेढ दशकयता राष्ट्रिय क्रिकेट टोलीबाट खेल्दै आएका विनोदले टियु मैदानमा कमजोर प्रदर्शन बिरलै गर्दछन् । त्यसैले उनलाई नेपाली क्रिकेटको घर टियु मैदानको अविरल हार्ड हिटर भन्दा फरक पर्दैन । यस मैदानमा प्रदर्शनकै कारण उनले स्थानीय समर्थक पनि कमाएका छन् । टियुमा विनोद खेल मैदानमा नहुँदा समेत उनका सुपरफ्यान नन्दु विनोदकै जर्सी लगाएर दर्शकदिर्घामा हिँडेको भेटिन्छन् ।

बुधबार विनोदले नवौं राष्ट्रिय खेलकुद अन्तर्गत क्रिकेट प्रतियोगितामा त्रिभुवन आर्मी क्लबबाट नेपाल पुलिस क्लबविरुद्ध २९ बलमा २ चौका र ७ छक्कासहित ६६ रनको विष्फोटक इनिङ खेले । पावर प्लेमा शीर्षक्रमले आक्रामक खेल्दै राम्रो आधार तय गरेका थिए । क्रिजमा जमेका युवा ओपनर अर्जुन साउद अम्पायरको विवादस्पद निर्णयपछि रन आउट भएपछि कप्तान विनोद मैदान छिरेका थिए । अर्जुन दशौं ओभरको अन्तिम बलमा अर्जुन तेस्रो रन लिनेक्रममा ब्याट नलिइ दौडेर डाइभ हान्दै क्रिज पार भएपनि अम्पायरले आउट दिएका थिए ।

हुन त विनोदले यसअघि आर्मीले खेलेको पहिलो खेलमा मधेश प्रदेशविरुद्ध ३३ बलमा ४ चौकासहित महत्त्वपूर्ण ३४ रन बनाउँदै अप्रत्यासित हारको संकट टारेका थिए । लुम्बिनीविरुद्ध त उनले ब्याटिङ नै गर्नु परेन ।

पुलिसविरुद्ध दुई ओभरमा विनोद र रोहितले कुनै जोखिम लिएनन् । १३ औं ओभरमा विनोदले आफ्नो स्वभाविक खेल खेले । बायाँ हाते स्पिनर ललितनारायण राजवंशीलाई पहिलो बलमै चोभार एण्डबाट डिप मिडविकेटमा सानदार छक्का हाने । एक बलपछि भण्डारीले अर्को छक्का हान्दै अब नरोकिने संकेत दिए । जब विनोद आफ्नो स्वभाविक लयमा आउँछन् तब खेल हेर्न पनि मज्जा आउँछ ।

अर्को ओभरको पाँचौं बलमा विनोदले स्ट्रेटमा सागर ढकाललाई छक्का हाने । तीव्र गतिका बलर गुलशन झालाई १५ औं ओभरको पहिलो बलमा डिप मिडविकेट र दोस्रो बलमा पुल गर्ने क्रममा बल एज लागेर विकेटकिपर पछाडि छक्का हुन पुग्यो ।

विनोद यतिकैमा रोकिएनन् । १७ औं ओभरमा करण केसीलाई एकै ओभरमा दुई चौका र एक छक्का हाने । १८ औं ओभरको चौथो बलमा गुलशनलाई विनोदले अर्को डिप मिडविकेटमा उत्कृष्ट छक्का हानेका थिए ।

नेपालका प्रमुख बलर रहेको पुलिसविरुद्धनै आर्मी आक्रामक रुपमा रन जोड्न सफल रहयो । पुलिसविरुद्ध बलियो लक्ष्य प्रस्तुत गर्दै विनोदले टस जितेर पहिला ब्याटिङ गर्ने निर्णय सही भएको सावित गरे । नतिजा आर्मीले पुलिसलाई १३ रनले हराउँदै फाइनल सम्भावना बलियो बनाएको छ ।

विहीबार सेमिफाइनलमा विनोदले जन्मथलो सुदूरपश्चिमविरुद्ध आर्मीको कप्तानी गर्नेछन् । यदि वर्षाको कारण खेल नभएपनि आर्मी फाइनलमा समूह विजेताको कारण पुग्नेछ ।

आर्मी र विनोदलाई फापेको टियु

दुई वर्षअघि प्रधानमन्त्री कप एकदिवसिय प्रतियोगितामा आर्मीका प्रमुख खेलाडी करण केसी, सोमपाल कामी र कुशल मल्ल टि टेन खेल्न गएपनि उनी विनानै च्याम्पियन बन्यो । त्यसमा विनोदको प्रदर्शन महत्वपूर्ण थियो । विनोद भण्डारीले ६ खेल १ सय ७४ रन बनाएका थिए । पहिलो खेलमै गण्डकी प्रदेशविरुद्ध विनोदले ७६ बलमा ११ चौका र ५ चौकासहित १ सय ११ रनको शतकीय इनिङ खेलेका थिए ।

गतवर्ष भएको काठमाडौं मेयर्स कपमा विनोद सर्वाधिक रन बनाउने ब्याटर थिए । उनले ४ खेलमा १ शतकसहित १ सय ८४ रन बनाएका थिए । विनोदले बागमतीविरुद्ध २ सय ६७ रनको विजयी लक्ष्य पछ्याउनेक्रममा १ सय १४ बलमा ८ चौका र ७ छक्कासहित १ सय १९ रनको इनिङ खेलेका थिए । तर आर्मी १० रनले बागमतीसँग स्तब्ध भयो । उक्त खेलमा पारस खड्काले १ सय ११ रनको शतकीय इनिङ खेलेका थिए ।

टियुको मैदानमा प्रदेश र विभागीय टोलीबीच कडा प्रतिस्पर्धा कमै देख्न पाइन्छ । विनोदले बागमतीविरुद्ध बनाएको शतकनै घरेलु क्रिकेटमा टियु मैदानमा बनेको अन्तिम शतक हो । सिनियर टोलीबाट भने रोहित पौडेल र दीपेन्द्रसिंह ऐरीले केहि महिना अघि शतक हानेका थिए ।

पुलिसविरुद्धको उत्कृष्ट प्रदर्शनपछि विनोदले धेरैपछि राम्रो खेल पाएको बताए । ‘आज मलाई कस्तो लाग्यो भने आर्मीले धेरैपछि राम्रो खेल खेल्न पाएको थियो । प्रदेशहरुसँग खेल्दा त्यस्तो बलियो टोली भेटिदैन । जति गरेपनि प्रतिस्पर्धा हुने भनेको नै पुलिस, आर्मी र एपिएफबीच हो । आजको खेल एकदमै राम्रो थियो । यसले सबै खेलाडीको आत्माविश्वास बढी नै हाल्छ’, विनोदले भने ।

घरेलु क्रिकेटमा सानदार प्रदर्शन गरि रहेका भण्डारीले अन्तर्राष्ट्रिय स्तरमा प्रदर्शन गर्न मानसिक रुपमै तयार हुनुपर्ने बताउँछन् । ‘माथि गएपछि मेरो विचारमा मानसिक सोच परिवर्तन गर्नुपर्छ । सबै खेलाडीहरु १९-२० नै छन् । कोही पनि तलमाथि फरक छैनन् । एउटा मात्र फरक भनेको मानसिक सोच हो । माथिको स्तर खेल्ने त्यो मानसिक सोच हुनुपर्छ’, विनोदले भने ।

‘हो त्यत्रो वर्ष खेलेपछि मलाई अनुभुती भएको छ कि माथिल्लो लेभलको खेल्न मानसिक रुपमा बलियो हुनुनै पर्छ । एउटा राष्ट्रिय प्रतियोगिता राम्रो खेलेसँगै कुनैपनि खेलाडी नेपाली टोलीमा पर्छ भने गाह्रो हुन्छ’, विनोदले भने ।

विनोदले राम्रो सुरुवातलाई आक्रामक ब्याटिङ गर्दै उत्कृष्ट अन्त्य गरे । उनले शीर्ष ब्याटरले राम्रो आधार दिएको बताए । ‘अर्जुनले राम्रो इनिङ खेल्यो । पावर प्लेमा राम्रो गरेपछि फिनिसिङमा राम्रो गर्नुपर्ने थियो । मध्य ओभरमा रनरेट सुस्त गर्दा अलिकति गाह्रो भएको थियो । विकेट हातमा भएपछि रन बन्छ भन्ने थियो । खेलिरहेको ब्याटर अन्त्यसम्म खेलेको छ भने गाह्रो नै हुन्छ’, उनले भने ।

कुनैपनि विभागीय टोलीलाई राष्ट्रिय खेलकुद जित्नै पर्ने दबाब हुन्छ । त्यसैले हरेक विभागीय टोली यस प्रतियोगितालाई निकै महत्वपूर्ण रुपमा लिन्छन् । तर समूह बी मा बागमती प्रदेश र नेपाल एपिएफ क्लब एक खेल पनि खेल्न नपाई बाहिरिए । खेलको मिति पुन: समायोजन गर्न अन्य ९ टोली सहमत भएपनि आर्मीले भने मानेको थिएन । एनआरएन बैठकमै गएन ।

विनोद आफूले प्रतियोगिता सुरु हुनुअघि नै यो प्रश्न आफैंले सोधेकाले नियमअनुसार नै अघि बढेको बताउँछन् । ‘प्रतियोगिता पहिला पानीको समयमा भयो । मेरो विचारले अलि पछाडिनै हुनुपर्ने थियो । एक पटक सुरु भएपछि ड्र भएको खेल पुन गर्न त्यो चाहिँ मलाई ठिक लाग्दैन । अब उनीहरुको दुर्भाग्य हो । मैले पहिलो बैठकमै अम्पायर विनय कुमार झालाई कुनै टोलीले एउटा पनि खेल खेलेन भने के हुन्छ भनेर सोधेको थिए’, विनादेले भने, ‘विनय सरले के भन्नु भयो भने एउटा टोलीको नहोला । तर अन्य टोलीको एक दुईवटा खेल हुन्छ । त्यसैलाई मान्ने छौं भनेपछि त्यो कुरा त्यहाँनै स्पष्ट भयो । हिजोको बैठक गर्नुपर्ने थियो जस्तो मलाई लाग्दैन ।’

‘हो, विभागमा राखेपले आयोजना गर्ने राष्ट्रिय खेलकुद जित्नैपर्ने दबाब हुन्छ । त्यो अरुले भन्ला नभन्ला । त्यसको मतलब यो होईन कि अर्को टोलीलाई जबर्जस्ती मौका दिने । खेल भईसक्यो भनेपछि भईसक्यो । आइसिसीको नियम अनुसार नै जानुपर्छ । आर्मीले विरोध गर्यो वा फराकिलो मत राख्यो भन्नुपर्छ जस्तो लाग्दैन’, आर्मीका कप्तानले भने ।

यता नेपाली क्रिकेट टोली र छनोट समितिले विनोद नै नेपालको उत्कृष्ट विकेटकिपर भएको बताउँदै आएको छ । तर उनको प्रदर्शन भने अन्तर्राष्ट्रिय क्रिकेटमा पछिल्लो समय अपेक्षा अनुसार छैन । नेपालले पछिल्लो समय आसिफ शेख र अर्जुन साउदलाई त्यस भूमिकामा प्रयोग गरेको छ । केन्या भ्रमणमा अर्जुन साउदले उत्कृष्ट प्रदर्शन र विकेटकिपरको भूमिका निर्वाह गरेका थिए । यसले विनोदलाई उत्कृष्ट प्रदर्शन नगरि अर्को विकल्प छैन ।

विनोद नेपालका अनुभवी विकेटकिपर हुन् । हार्ड हिटरको पहिचान बनाएका विनोदबाट टियुमा जस्तै अन्तर्राष्ट्रिय क्रिकेटमा प्रदर्शन चाहन्छ । विनोद आर्मीको कप्तान हुँदा चौथो नम्बरमा ब्याटिङ गर्दै राम्रो प्रदर्शन गरेका छन् । त्यसमा सफल पनि भएका छन् । विनोदले ओडिआईमा हानेको एकमात्र अर्धशतक २०२० मा अमेरिकाविरुद्ध टियुमै थियो ।

टि२० आईमा पछिल्ला ६ मध्य चार खेलमा ब्याटिङ गर्न पाएका छैनन् । गतवर्ष त्रिकोणात्मक सिरिजमा नेदरल्यान्ड्ससँग टियुमै ७ बलमा ७ रन जोडेका थिए । मलेसियाविरुद्ध ८ बलमा ८ रन नै जोडेका थिए । विनोद आफू भन्दा पनि सेट भएका ब्याटरलाई स्ट्राइक दिन खोजेका थिए । कुनैपनि ब्याटरले ६–७ बल विपक्षका खेलाडी बुझ्न लाग्छ ।

कुनैपनि हिटर र फिनिसरको काम थोारै बलमा धेरै रन बनाउनु पर्ने हुन्छ । आक्रामक सट खेल्दा विकेट गुम्ने जोखिम पनि त्यतिनै हुन्छ । टिम म्यानेजमेन्टले त्यसैले खेलाडीलाई स्वतन्त्र छाड्दै स्वभावीक खेल खेल खेल्न पनि दिनुपर्छ । समर्थक र नेपाल टियुको प्रदर्शन विनोदबाट अन्तर्राष्ट्रिय क्रिकेटमा चाहन्छ । अनुभवी खेलाडीबाट त्यो प्रदर्शन आवश्यक पनि पर्छ । अन्यथा सामान्य प्रदर्शनले भने अव उनलाई नेपाली टोलीमा स्थान बनाउन कठिन देखिन्छ ।

नेपालले विनोदको विकल्पमा अर्जुन र आसिफ मध्य एकलाई तयार पार्ने देखिन्छ । तर यी दुवै ओपनरको भूमिकामा हुँदा विनोदले विकेकिपरमा अझ बढी प्राथमिकता पाउन सक्छन् । त्यसको लागि घरेलु मात्र होईन अन्तर्राष्ट्रिय क्रिकेटमा पनि त्यतिनै उत्कृष्ट प्रदर्शन गर्नुपर्छ ।