काठमाडौं (हाम्रो खेलकुद) – त्रिभुवन आर्मी क्लब नवौं राष्ट्रिय खेलकुद अन्तर्गत क्रिकेट प्रतियोगितामा फाइनलमा पुगेको छ । टियु क्रिकेटमा बिहीबार हुनुपर्ने पहिलो सेमिफाइनल खेलमा सुदूरपश्चिमसँगको खेल भिजेको आउटफिल्डको कारण खेल हुन नसक्ने भएपछि आर्मी समूह ए को विजेताको कारण फाइनलमा पुगेको हो ।

खेल बिहान ९ : १५ मा टियु क्रिकेट मैदानमा हुनुपर्ने हो । तर बुधबार राती परेको वर्षाको कारण आउटफिल्ड भिजेपछि खेल रद्द हुन पुगेको हो । ‘खेल खेल्न योग्य नभएपछि पहिलो खेल रद्द भएको छ । आर्मी समूह विजेता भएको कारण फाइनलमा पुगेको छ’, म्याचरेफ्री समिर खानले हाम्रो खेलकुदसँग भने ।

अम्पायरले साढे ११ मा मैदान निरिक्षण गर्दै दुबै टिमका कप्तान विनोद भण्डारी र राजु रिजालको सहमतीमा खेल नहुने घोषणा गरेका हुन् ।

आर्मीले समूह ए मा नेपाल पुलिस क्लबलाई १३ रनले हराउँदै समूह ए को विजेताको रुपमा सेमिफाइनलमा पुगेको थियो । पुलिससँगको जित आर्मीको लागि निर्णायक बन्यो ।

दास्रो सेमिफाइनल खेलमा नेपाल पुलिस क्लब र एनआरएनए नेपालबीच हुँदै छ । यदि यस खेल रद्ध भए एनआरएनए नेपाल फाइनलमा पुग्ने छ । फाइनल शुक्रबार हुनेछ ।

समूह बी बाट एनआरएनए नेपाल ४ खेलमा १ मा जित र ३ खेलमा अंक बाँड्दै पाँच अंकका साथ शीर्ष स्थानमा रहँदै समूह विजेताको रुपमा सेमिफाइनलमा स्थान बनाएको थियो । उपाधि दावेदार एपिएफ र बागमती प्रदेश एक खेल पनि खेल्न नपाई बाहिरिएपछि समूह बी बाट एनआरएनए र सुदूरपश्चिमले सेमिफाइनलमा स्थान बनाएका थिए ।

सुदूरपश्चिम ४ खेलमा १ मा जित, १ मा हार र २ खेल अंक बाँड्दै ४ अंकका सेमिफाइनलमा स्थान बनाएको थियो । तर समूह उपविजेताको कारण बाहिरियो ।

सुदूरपश्चिम, बागमती र एपिएफको ४–४ अंक थियो । सुदूरपश्चिमले एक खेल जितेको हुँदा नियम अनुसार सेमिफाइनलमा पुगेको हो । नियम अनुसार समान अंक भएमा जित हेर्ने गरिन्छ ।

आर्मी ५ खेलमा ३ मा जित र २ खेलमा अंक बाँड्दै ८ अंकका साथ शीर्ष स्थानमा रहँदै समूह विजेता बनेको थियो । पुलिस ५ खेलमा २ मा जित, एकमा हार र २ मा अंक बाँड्दै ६ अंकका साथ नेटरनरेटमा दोस्रो स्थानमा रहँदै सेमिफाइनलमा स्थान बनायो । कर्णाली ५ खेलमा २ मा जित, १ मा हार र २ खेलमा अंक बाँड्दै ६ अंक भएपनि नेटरनरेटको कारण बाहिरिएको हो ।