काठमाडौं (हाम्रो खेलकुद) – प्रधानमन्त्री कप एकदिवसिय क्रिकेट प्रतियोगिताको पाँचौं संस्करण अर्को महिना हुने भएको छ । राष्ट्रिय खेलकुद परिषद् (राखेप) को कार्यक्रम अन्तर्गत नेपाल क्रिकेट संघ (क्यान) ले आयोजना गर्ने पाँचौं संस्करणको प्रधानमन्त्री कप एकदिवसिय राष्ट्रिय प्रतियोगिता कार्तिक १२ देखि २६ गते सम्म काठमाडौंमा हुने भएको छ ।

क्यानले आफू मातहतको जिल्ला र प्रदेशलाई छनोट गर्न पत्र पठाएको छ । पत्र अनुसार जिल्ला छनोटको असोाज २० मा नाम बुझाउन भनेको छ । त्यस्तै प्रदेश छनोट कार्तिक ६ सम्म पूरा गर्न भनिएको छ । प्रतियोगिता तीन विभागीय र सात प्रदेशसहित कुल १० टोली हुनेछन् । प्रतियोगताको समूह चरणमा दुई समूह हुनेछ ।

‘हामी खेलाडीलाई धेरै खेल दिन तेस्रो देखि दशौं स्थानसम्म निर्धारण गर्ने खेल गराउँछौं । त्यसले गर्दा टिमहरुले राम्रो खेल पाउँछन्’, क्यानका कार्यवाहक सचिव प्रशान्त व्रिकम मल्लले हाम्रो खेलकुदसँग भने ।

अर्थात अब तेस्रो, चौथोदेखि दशौं स्थान सम्म कुन टोली कुन स्थानमा रहने खेल खेल्नुपर्ने हुन्छ । यसअघि भने समूह चरणबाट शीर्ष दुई दुई टोली समेमिफाइनलमा स्थान बनाउँदै आएका थिए । अन्य बाहिरिंदै आएका थिए । फाइनलमा पुग्ने दुई टोलीपछि अन्य दुवै सेमिफाइनलबाट बाहिरिन्थे । मल्लका अनुसार अब तेस्रो देखि १० औं स्थान निर्धारण गर्ने खेल पनि गर्ने तयारी गरेको छ । यसले खेलाडीले बढी खेल पाउने बताए ।

राष्ट्रिय प्रतियोगिता लिगमा गर्न नसकेको भन्दै क्यानको चर्को आलोचना हुँदै आएको छ । पहिलो संस्करणको फाइनल वर्षाको कारण प्रभावित हुँदा उपाधि नेपाल आर्मी र नेपाल पुलिस क्लबले संयुक्त रुपमा बाँडेका थिए । दोस्रो संस्करण २०१८ को फाइनलमा एपिएफले आर्मीलाई ६ विकेटले हराउँदै उपाधि जितेको थियो । तेस्रो संस्करण २०१९ मा पुलिसले आर्मीलाई ४ विकेटले हराउँदै उपाधि जितेको थियो ।

चौथो संस्करणको फाइनलमा एपिएफलाई ३३ रनले हराउँदै आर्मीले उपाधि जितेको थियो । पहिलो संस्करण काठमाडौं क्रिकेट ट्रेनिङ सेन्टर तथा दोस्रो र तेस्रो नेपालय इन्टरनेशनल प्रा.लीको व्यवस्थापनमा सम्पन्न भएको थियो । चौथो भने सन् २०२० मा क्यान आफैंले आयोजना गरेको थियो ।

गतवर्ष नेपालले टि२० विश्वकप ग्लोबल छनोट ए खेल्ने भएपछि एकदिवसियको सट्टा क्यानले टि२० शैलीमा गरेको थियो । गतवर्ष टि२० राष्ट्रिय प्रतियोगिता उपाधि एपिएफले पुलिसलाई २१ रनले हराउँदै उपाधि जितेको थियो । त्यो प्रदर्शनलाई आधार मानेर क्यानले टि२० विश्वकप ग्लोबल छनोट खेल्ने टोली घोषणा गरेको थियो । उक्त छनोटमा नेपालले सेमिफाइनलमा युएईसँग ६८ रनको हार बेहोर्दै विश्वकप खेल्ने अवसर गुमाएको थियो ।