एजेन्सी – पाकिस्तान र इंग्ल्यान्डबीच हुने ७ टि२० आई खेलको सिरिज अन्तर्गत पहिलो खेल आज हुँदैछ । खेल नेपाली समय अनुसार राती ८ : १५ मा नेशनल स्टेडियम कराँचीमा सुरुहुनेछ ।

दुबै टोली सिरिजमा विजयी सुरुवात गर्न चाहन्छन् । टि२० विश्वकप अघि आफ्नो कमजोरी सुधार गर्ने यी दुबै टोलीलाई अन्तिम अवसर हो । इंग्ल्यान्ड १७ वर्षपछि पाकिस्तान भ्रमणमा छ ।

पाकिस्तान घरेलु मैदान, समर्थक र कन्डिसनको फाइदा उठाउँदै सिरिजमा सानदार प्रदर्शनका साथ उच्च मनोबलका साथ अर्को महिना अष्ट्रेलिया विश्वकप खेल्न जान चाहन्छ । तर अघिल्लो साता एसिया कपमा कप्तान बाबर आजमको ब्याटिङ सम्झन लायक रहेन । पाकिस्तान बाबरबाट उत्कृष्ट प्रदर्शन चाहन्छ । अर्का ओपनर रिजवानले लगातार राम्रो प्रदर्शन गर्दै आएका छन् । तर टोलीको आवश्यकता अनुसार आक्रामक ब्याटिङ खेल्नुपर्ने हुन्छ ।

एसिया कप फाइनलमा पराजित भएको पाकिस्तानको मध्यक्रम ब्याटिङ ठूलो समस्या हो । मध्यक्रमका ब्याटरमा खुशदील शाह, इफ्तिखर अहमद, आसिफ अली, शन मकसुद र हैलर अली छन् । इफ्तिखरको स्थान शन मकसुदले लिने देखिन्छ । खुशदील शाहको स्थान हैदर अलीले लिनसक्छन् । मोहम्मद नवाज र शादब खान तल्लोक्रमका हतियार हुन् ।

तीव्र गतिका बलर हरिस रौफ, नसिम शाह र शाहन शाह अफ्रिदी हुनेछ्न । अफ्रिदी सानदार पूनरागमन गर्न चाहन्छन् । खुट्टाको चोटको कारण एसिया कप गुमाएका थिए । एसिया कपमा नसिम शाहले उत्कृष्ट प्रदर्शन गरेका थिए । अफ्रिदी र नसिश शाहको जोडी इंग्ल्यान्डलाई घातक बन्नसक्छ ।

यता इंग्ल्यान्ड युवा खेलाडीका साथ पाकिस्तान भ्रमणमा छ । ओपनरमा फिलिप साल्ट र एलेक्स हेल्स हुनेछन् । हेल्स २०१९ पछि पहिलो पटक इंग्ल्यान्डको टोलीमा फर्किका हुन् । उनी सानदार पूनरागन गर्ने तयारीमा छन् । पाकिस्तान सुपर लिग खेल्दै आएका उनलाई मैदान र कन्डिसनको तयारी राम्रोसँग थाहा छ ।

कप्तान जस बटलर भने चोटका कारण खेल गुमाउने उच्च सम्भावना छ । यो अवस्थामा मोईन अलीले इंग्ल्यान्डको कप्तानी गर्नेछन् । मध्यक्रममा डेविड मलान, मोईन अली, ह्यारी ब्रुक्स र विल ज्याक्स हुनेछन् । तल्लोक्रमका साम करणले राम्रो ब्याटिङ गर्न सक्छन् । स्पिनरमा मोईन अली र आदिल राशिद हुनेछन् । तीव्र गतिका बलरमा रिस टोप्ली, मार्क वुड, रिस टोप्ली र क्रिस वोक्स हुनेछन् ।

हेड टु हेड :

पाकिस्तान र इंग्ल्यान्डबीच हालसम्म २१ टि२० आई खेल भएका छन् । इंग्ल्यान्ड १४ र पाकिस्तान ६ खेलमा विजयी भएको छ । पछिल्ला पाँच खेलमा इंग्ल्यान्ड तीन र पाकिस्तान दुई खेलमा विजयी भएका छन् ।

सुरुवाती चार टि२० आई खेल कराँचीमा हुनेछ । कराँचीमा २० सेप्टेम्बर, २२ सेप्टेम्बर, २३ सेप्टेम्बर र २५ सेप्टेम्बरमा एक देखि चार टि२० आई खेल हुनेछन् । पाँचौं, छैटौं र सातौं टि२० आई खेल लाहोरमा क्रमशः २८, ३० र २ अक्टोबरमा हुनेछ ।