एजेन्सी – अष्ट्रेलियाले दोस्रो टि२० आई खेलमा भारतलाई ९१ रनको बलियो लक्ष्य दिएको छ । नागपुरमा टस हारेर पहिला ब्याटिङको निम्तो पाएको अष्ट्रेलियाले निर्धारित ८ ओभरमा ५ विकेट गुमाउँदै ९० रन बनायो ।

अष्ट्रेलियाका विकेटकिपर म्याथु वेड २० बलमा ४ चौका र ३ छक्कासहित सर्वाधिक ४३ रनमा अविजित रहे । कप्तान आरोन फिन्चले १५ बलमा ४ चौका र १ छक्कासहित ३१ रनमा आउट भए ।

दोस्रो ओभरको तेस्रो बलमा ओपनर क्यामरन ग्रीन पाँच रनमा रन आउट भए । पहिलो खेलमा ग्रीनले ६१ रन बनाउँदै प्लेयर अफ द म्याच चुनिएका थिए । अक्षर पटेलले तीन बलपछि ग्लेन म्याक्सवेललाई शून्यमा बोल्ड गरे ।

चौथो ओभरको पहिलो बलमा टिम डेविडलाई अक्षर पटेलले बोल्ड गरे । पाँचौं ओभरको अन्तिम बलमा जस्प्रित बुमराहले फिन्चलाई बोल्ड गरेपछि अष्ट्रेलिया ४६–४ को अवस्थामा पुगेको थियो ।

स्टिभ स्मिथ ७ रनमा आउट भए । भारतका अक्षर पटेलले २ ओभरमा १३ रन खर्चेर २ विकेट लिए । जस्प्रित बुमराहले २ ओभरमा २२ रन खर्चेर १ विकेट लिए । अन्तिम ओभरमा हर्षल पटेलले १९ रन खर्चिएका थिए ।

तीन टि२० आई खेलको सिरिजमा अष्ट्रेलियाले १-० को अग्रता लिएको छ । पहिलो खेलमा अष्ट्रेलिया ४ विकेटले विजयी भएको थियो ।