एजेन्सी – ओपनर रहकीम कर्नवालको छक्काको वर्षातमा बार्बाडोस रोयल्सले क्यारेवियन प्रिमियर लिग (सिपिएल) को पहिलोे क्वालिफायरमा गुयाना एमेजन वारियर्सलाई ८७ रनले हराउँदै फाइनलमा स्थान बनाएको छ ।

गुयानामा टस हारेर पहिला ब्याटिङको निम्तो पाएको बार्बाडोस रोयल्सले निर्धारित २० ओभरमा ५ विकेट गुमाउँदै १ सय ९५ रन बनायो । ओपनर रहकीम कर्नवालले ५४ बलमा २ चौका र ११ छक्कासहित ९१ रनको इनिङ खेले ।

आजम खानले ३५ बलमा ३ चौका र ४ छक्कासहित ५२ रनको आक्रामक इनिङ खेले । कप्तान काइल मयर्सले २० बलमा १ चौका र ३ छक्कासहित २६ रन जोडे । अन्यले भने राम्रो पदर्शन गर्न सकेनन् । वारियर्सका रोमारियो शेफर्डले ४ ओभरमा २९ रन खर्चेर २ विकेट लिए ।

जितका लागि १ सय ९६ रनको विजयी लक्ष्य पछ्याएको वारियर्स १७.४ ओभरमा १ सय ८ रनमा अल आउट भयो । कप्तान शिम्रन हेटमायरले २९ बलमा ३ चौका र १ छक्कासति सर्वाधिक ३७ रन बनाए ।

बार्बाडोसका लागि रामोन सिमन्ड्स ३ ओभरमा १७ रन खर्चेर ३ विकेट लिए । कर्नवालले २ ओभरमा १० रन खर्चेर २ विकेट लिए । मुजिब उर रहमानले दुई विकेट लिए ।

एलिमिनेटर खेलमा बुधबार विहान सेन्ट लुसिया किंग्स र जमैका तलवाजबीच प्रतिस्पर्धा हुनेछ । विजेता टोलीले फाइनलमा स्थान बनाउन वारियर्ससँग प्रतिस्पर्धा गर्नेछन् । फाइनल शुक्रबार हुनेछ ।