एजेन्सी – पूर्व भारतीय अलराउन्डर युसुफ पठानको आक्रामक ब्याटिङमा भिलवारा किंग्सले लेजेन्ड्स क्रिकेट लिगमा गुजरात जायन्ट्स ५ विकेटले पराजित गरेको छ ।

जितको लागि १ सय ८७ रनको विजयी लक्ष्य पछ्याएको किंग्सले १९.४ ओभरमा ५ विकेट गुमाउँदै पूरा गर्यो । युसुफ पठान १८ बलमा ४ छक्का र एक चौकासहित ३९ रनमा आउट भए । दुई विकेट लिँदै अलराउन्ड प्रदर्शन गरेका पठान खेलको प्लेयर अफ द म्याच चुनिए ।

जेसल कारिया २४ बलमा ६ चौका र १ छक्कासहित ३९ र कप्तान इरफान पठान १४ बलमा २ चौका र १ छक्कासहित २६ रनमा अविजित रहे । ओपनर विलियम पेटरफोर्ड ४०, मोर्न भ्यान २६ र शेन वाटसन १ रनमा आउट भए । गुजरातका ग्रीम स्वामले सर्वाधिक दुई विकेट लिए ।

त्यसअघि जोधपुरमा टस हारेर पहिला ब्याटिङ थालेको गुजरातले निर्धारित २० ओभरमा ६ विकेट गुमाउँदै १ सय ८६ रन जोडेको थियो । गुजरातका क्रिस गेलले ४० बलमा ९ चौका र ३ छक्कासहित सर्वाधिक ६८ रनको योगदान दिए । ४३ वर्षीय गेललाई किंग्सका शेन वाटसनले १४ औं ओभरको चौथो बलमा युसुफ पठानबाट क्याच गराएका थिए ।

आक्रामक ब्याटिङ गर्नेक्रममा गेलले युसुफ पठानलाई एकै ओभरमा तीन चौका र दुई छक्का हान्दै कुल २५ रन जोडेका थिए । आठौं ओभरको दोस्रो, तेस्रो र पाँचौं बलमा गेलले पठानलाई चौका हानेका थिए । चौथो र छैटौं बलमा छक्का हानेका थिए । त्यसपछि पठानले पुन बलिङ पाएनन् ।

ओपनर लेन्डन सिमन्सले १८ बलमा ५ चौकासहित २२ रन बनाए । कप्तान पार्थिव पटेल र केभिन ओ ब्रायन ४ रनमा आउट भए । यी दुबै युसुफ पठानको बलमा आउट भएका थिए । मध्यक्रमका यशपाल सिंह ३७ बलमा ६ चौका र २ छक्कासहित ५८ रन बनाए ।

थिसरा परेरा ११ बलमा १ चौका र १ छक्कासति १९ रनमा आउट भए । किंग्सका युसुफ पठानले २ ओभरमा ३४ रन खर्चेर २ विकेट लिए । श्रीसान्त, सुदीप त्यागी र शेन वाटसनले एक एक विकेट लिए ।