एजेन्सी – भारत र दक्षिण अफ्रिकाबीच दोस्रो टि२० आई खेलमा गुवाहाटीमा छक्का, चौका र रनको वर्षा भयो । एक समय भारत एकल प्रदर्शनमा हाबी भएपनि डेविड मिलर किलर बनेर प्रस्तुत भए ।

पिच रिपोर्ट अनुसार १ सय ७० रन सुरक्षित मानिने बताईएको थियो । तर त्यस विपरित ब्याटिङ भयो । ४० ओभरमा मात्र ६ विकेट गुम्दा कुल ४ सय ५८ रन बनेको थियो । खेलमा तीन अर्धशतक र एक शतक प्रहार भयो ।

भारतबाट १३ र दक्षिण अफ्रिकाबाट १२ गरि कुल २५ छक्का प्रहार भए । भारतका तीन र दक्षिण अफ्रिका एक खेलाडीको २ सय माथिको स्ट्राइक रेटमा रन जोडे । भारतले २५ र दक्षिण अफ्रिकाले १५ गरि कुल ४० चौका प्रहार भए । दक्षिण अफ्रिकाले भारतमा पहिलो पटक टि२० आई सिरिज गुमाउन पुग्यो ।

डेथ ओभर अर्थात १६ देखि २० ओभरमा टि२० इतिहासकै सर्वाधिक बढी रन बन्यो । भारतले डेथ ओभरमा ८२ र दक्षिण अफ्रिकाले ७८ गरि कुल १० ओभरमा १ सय ६० रन बनेको थियो । यसअघि डेथ ओभरमा अष्ट्रेलिया र पाकिस्तानबीच सन् २०१० मा १ सय ४८ रन बनेको थियो ।

विशाल लक्ष्य पछ्याउँदा दक्षिण अफ्रिका कप्तान टेम्बा बभुमा ७ बल खेल्दा खाता खोल्न सकेनन् । उनको सुरुवात विष्फोटक हुनुपर्ने हो । तर टेस्ट शैली पनि हुन सकेन । राइली रोसेउ पनि लगातार दोस्रो खेलमा डक आउट भए । दक्षिण अफ्रिकाले सुरुवाती १० ओभरमा तीन विकेट गुमाउँदै ७० रन बनाएको थियो ।

जुन समय ६० बलमा जितको लागि १ सय ६८ रन चाहिँएको थियो । अन्तिम १० ओभरमा दक्षिण अफ्रिकाले १ सय ५१ रन बनाउँदै जित नजिक पुर्याए । भारतले सुरुवाती १० ओभरमा १ विकेट गुमाउँदै ९६ रन बनाएको थियो । भारतले अन्तिम १० ओभरमा १ सय ४१ रन बनाएको थियो ।

भारतले निर्धारित २० ओभरमा ३ विकेट गुमाउँदै २ सय ३७ रन बनायो । सूर्यकुमार यादवले २२ बलमा ५ चौका र ५ छक्कासहित ६१ रनको विष्फोटक इनिङ खेले । सूर्यले १८ बलमा अर्धशतक पूरा गरेका थिए । ओपनर लोकेश राहुलले २८ बलमा ५ चौका र ४ छक्कासहित ५७ रनको इनिङ खेले ।

तेस्रो विकेटका लागि विराट कोहली र सूर्यकुमार यादवले ४२ बलमा १ सय २ रनको सानदार शतकीय साझेदारी गर्दै विशाल योगफलको आधार तय गरे । विराट कोहली २८ बलमा ७ चौका र १ छक्कासहित ४९ रनमा अविजित रहे । दीनेश कार्तिक ७ बलमा १ चौका र २ छक्कासहित १७ रनमा अविजित रहे ।

दक्षिण अफ्रिकाका केशव महाराजले ४ ओभरमा २३ रन खर्चेर २ विकेट लिए । केशव बाहेक अन्य चार तीव्र गतिका बलरको प्रदर्शन राम्रो हुन सकेन । लुन्गी एनगिडीले ४ ओभरमा ४९ र वेन पार्नेलले ५४ रन खर्चिए । एनरिच नोर्कियाले ३ ओभरमा ४१ रन खर्चिए । कागिसो रबाडाले ४ ओभरमा ५७ रन खर्चिए । दक्षिण अफ्रिकाका चार तीव्र गतिका बलरले १५ ओभर बलिङ गर्दा विकेट विहीन हुँदै कुल २ सय १ रन खर्चेका थिए ।

जितको लागि २ सय ३८ रनको विशाल विजयी लक्ष्य पछ्याएको दक्षिण अफ्रिकाले निर्धारित २० ओभरमा ३ विकेट गुमाउँदै २ सय २१ रन बनायो । डेविड मिलरले ४७ बलमा ८ चौका र ७ छक्कासहित सर्वाधिक १ सय ६ रनको अविजित विष्फोटक शतकीय इनिङ खेले । दक्षिण अफ्रिकाको सुरुवात सम्झन लायक भने थिएन । पहिला संघर्ष गरेका डि ककले पछि मिलरलाई साथ दिएका थिए ।

मिलरको यो दोस्रो टि२० आई शतक हो । ओपनर क्विन्टन डि कक ४८ बलमा ३ चौका र ४ छक्कासहित ६९ रनमा अविजित रहे । चौथो विकेटका लागि मिलर र डि ककले १ सय ७४ रनको सानदार अविजित शतकीय साझेदारी गरेपनि हार टार्न सकेनन् । यो टि२० आई इतिहासमा कुनैपनि विकेटका लागि भएको उच्च साझेदारी हो ।

एकै ओभरमा दुई ब्याटर डकमा गुमाएपछि एडेन माक्रमरमले इनिङ केहि उकासेका थिए । माक्ररम १९ बलमा ४ चौका र १ छक्कासहित ३३ रनमा अक्षर पटेलको बलमा बोल्ड भए ।

भारतका अर्शदीप सिंहले ४ ओभरमा ६२ रन खर्चेर २ विकेट लिए । दीपक चाहरले ४ ओभरमा १ मेडनसहित २४ रन खर्चिए । रविचन्द्रन आश्विनले ४ ओभमा ३७, अक्षर पटेलले ५३, हर्षल पटेलले ४५ रन खर्चिए ।