काठमाडौं (हाम्रो खेलकुद) – तीव्र गतिकी बलर अनुराधा चौधरीको घातक बलिङमा मधेश प्रदेशले नवौं राष्ट्रिय खेलकुद अन्तर्गत महिला क्रिकेट प्रतियोगितामा घरेलु टोली गण्डकीलाई ४० रनले हराउँदै विजयी सुरुवात गरेको छ ।

जितको लागि ७८ रनको सामान्य लक्ष्य पछ्याएको गण्डकी १९ ओभरमा ३७ रनमा अल आउट भयो । गण्डकीको लागि शिला क्षेत्रीले २२ बलमा सर्वाधिक १० रन बनाइन् । अन्य कुनैपनि ब्याटरले दोहोरो अंकमा रन बनाउन सकेनन् ।

ओपनर सृजना पौडेल ७, विकेटकिपर ज्यात्स्निका मरासिनी ५ र कप्तान सृष्टि जैशी ३ रनमा आउट भए । मधेश प्रदेशकी अनुराधा चौधरीले ४ ओभरमा ८ रन खर्चेर ४ विकेट लिइन् । कप्तान कविता गौतमले ४ ओभरमा १ मेडनसहित ६ रन खर्चेर २ विकेट लिइन् । शान्ती चौधरीले ४ ओभरमा ८ रन खर्चेर २ विकेट र सन्तोषी चौधरीले एक विकेट लिइन् ।

त्यसअघि पोखरा रंगशालामा टस हारेर पहिला ब्याटिङ थालेको मधेश प्रदेशले निर्धारित २० ओभरमा ८ विकेट गुमाउँदै ७७ रन बनायो । मधेशका लागि तल्लोक्रमकी सरस्वती कुमारीले २७ बलमा सर्वाधिक १५ रन बनाइन् । साना प्रविन र एलिसा यादवले १४-१४ रन बनाए । अन्यले भने राम्रो प्रदर्शन गर्न सकेनन् ।

दुबै ओपनर अनुराधा र सबनम खातुन शून्यमा आउट भएका थिए । गण्डकी प्रदेशका लागि आकृती तिवारीले ४ ओभरमा १२ रन खर्चेर ३ विकेट लिइन् । कुसुम गोदारले ३ ओभरमा १ मेडनसहित ६ रन खर्चेर २ विकेट लिइ्न् ।

प्रतियोगितामा समूह ए मा नेपाल एपिएफ क्लब, मधेश प्रदेश, गण्डकी प्रदेश, सुदूरपश्चिम र बागमती प्रदेश छन् । समूह बी मा नेपाल पुलिस क्लब, कर्णाली प्रदेश, प्रदेश नम्बर १ र लुम्बिनी प्रदेश छन् । पुलिसले रुविना क्षेत्रीको कप्तानीमा पहिलो पटक सहभागिता जनाउन लागेको हो ।