काठमाडौं (हाम्रो खेलकुद) – नेपाल पुलिस क्लबले नवौं राष्ट्रिय खेलकुद अन्तर्गत महिला क्रिकेट प्रतियोगितामा कर्णाली प्रदेशलाई डकवर्थ लेविस पद्धतिको आधारमा ६३ रनले हराउँदै विजयी सुरुवात गरेको छ । पुलिसको महिला टोलीले यसै खेलमार्फत घरेलु क्रिकेटमा डेब्यू गरेको छ ।

पोखरा रंगशालामा टस जितेर पहिला ब्याटिङ थालेको पुलिसले निर्धारित २० ओभरमा ६ विकेट गुमाउँदै १ सय १० रन बनायो । पुलिसकी सम्झना खड्काले २१ बलमा २ चौकासहित सर्वाधिक २५ रन बनाउँदै प्लेयर अफ द म्याच चुनिन् ।

ओपनर काजल श्रेष्ठ र कविता कुँवर १६-१६ रनमा आउट भए । अप्सरी बेगम ४, रेवती धामी १४, कविजता जोशी ८ र कप्तान रुविना क्षेत्रीले ९ रन बनाइन् । कर्णालीकी अन्जु गुरुङले ४ ओभरमा २४ रन खर्चेर सर्वाधिक तीन विकेट लिइन् । बिना थापा र अन्जली क्षेत्रीले एक एक विकेट लिए ।

उक्त विजयी लक्ष्य पछ्याएको कर्णालीले १०.२ ओभरमा ७ विकेट गुमाउँदै १७ रन बनाउँदा वर्षाको कारण खेल रोकिएको थियो । कर्णालीकी दीक्षा पुरी सर्वाधिक ७ रनमा अविजित रहिन् । पुलिसका सबनम राई, संगिता राई, ईश्वरी विष्ट, कविता जोशी र हिरन्मई रायले एक एक विकेट लिए ।

दोस्रो खेल भने वर्षाको कारण प्रदेश १ र लुम्बिनीले अंक बाँडेका थिए । मंगलबार एपिएफ र बागमतीबीच प्रतिस्पर्धा हुनेछ । पहिलो खेलमा बागमतीले सुदूरपश्चिमलाई ८ विकेटले हराएको थियो । मंगलबार दोस्रो खेलमा सुदूर र गण्डकीबीच प्रतिस्पर्धा हुनेछ ।

 समूह ए मा एपिएफ, मधेश प्रदेश, गण्डकी प्रदेश, सुदूरपश्चिम प्रदेश र बागमती प्रदेश छन् । समूह बी मा नेपाल पुलिस क्लब, कर्णाली प्रदेश, प्रदेश १ र लुम्बिनी प्रदेश छन् । सबै खेल पोखरा रंगशालामा हुनेछन् । सेमिफाइनल असोज ३१ र फाइनल कार्तिक एक मा हुनेछ ।