पोखरा (हाम्रो खेलकुद) – मधेश प्रदेशले नवौं राष्ट्रिय खेलकुद अन्तर्गत महिला क्रिकेट प्रतियोगितामा सुदूरपश्चिम प्रदेशमाथि १५ रनको सहज जित हात पारेको छ । यो जितसँगै सेमिफाइनल सम्भावना पनि बलियो बनाएको छ ।

जितको लागि ९२ रनको विजयी लक्ष्य पछ्याएको सुदूरपश्चिम प्रदेशले निर्धारित २० ओभरमा ८ विकेट गुमाउँदै ७६ रन बनायो ।
सुदूरकी सर्वाधिक अनुभवी खेलाडी ऋतु कनोजियाले ३८ बलमा २ चौकासहित सर्वाधिक २७ रन बनाइन् । रुवि पोद्दारले ३७ बलमा १२ रन बनाइन् ।

अन्य खेलाडीले भने राम्रो प्रदर्शन गर्न सकेनन् । कप्तान विन्दु रावल ९ बलमा २ रनमा आउट भइन् । अनु कडायत डक, स्नेहा महरा ९ र यशोदा विष्टले ११ रन बनाइन् । सावित्री धामी र यशु पाण्डे डक आउट भए ।

मधेशकी सन्तोषी चौधरी ४ ओभरमा ८ रन खर्चेर २ विकेट लिइन् । शान्ती चौधरीले ४ ओभरमा १५ रन खर्चेर २ विकेट लिइन् । अनुराधा चौधरीले ४ ओभरमा २५ रन खर्चेर २ विकेट लिइन् । सरस्वती चौधरीले एक विकेट लिइन् ।

त्यसअघि पोखरा रंगशालामा टस जितेर पहिला ब्याटिङ थालेको मधेशले २० ओभरमा ९ विकेट गुमाउँदै ९१ रन बनाएको थियो । मधेशकी साना प्रविनले ४९ बलमा ३ चौकासहित सर्वाधिक ३५ रन बनाइन् । प्रविन बाहेक अन्यले राम्रो प्रदर्शन गर्न सकेनन् ।

ओपनर अनुराधा चौधरी शून्यमा आउट भइन् । गोमा आले २६ बलमा १ चौकासहित १० रनमा आउट भइन् । सरस्वती कुमारी, सन्तोषी चौधरी र पुष्पा फुँयाल एक एक रनमा आउट भइन् । कप्तान कविता गौतम १० बलमा १ चौकासहित ९ रनमा अविजित रहिन् ।

रोजी कडारी ३ बलमा १ चौकासहित ४ रनमा अविजित रहिन् । सावित्री धामी ४ ओभरमा १८ रन खर्चेर ४ विकेट लिइन् । मनिषा चौधरी र यशु पाण्डेले एक एक विकेट लिइन् ।

अंक तालिका

मधेश २ खेलमा ४ अंकका साथ समूह ए मा दोस्रो स्थानमा छ । नेपाल एपिएफ क्लब २ खेलमा ४ अंकका साथ नेटरनरेटको कारण शीर्ष स्थानमा छ । मधेशले शनिबार एपिएफ र आइतबार बागमतीसँग खेल्नेछ । बागमती २ खेलमा १ मा जित र १ मा हारसहित तेस्रो स्थानमा छ ।

बागमतीले अव शनिवार गण्डकी र आइतवार मधेश प्रदेशसँग खेल्नेछ । सुदूरपश्चिम ३ खेलमा १ मा जित र २ मा हारका साथ चौथो स्थानमा छ । गण्डकी भने तीनै खेलमा पराजित हुँदै प्रतियोगिताबाट बाहिरिने पहिलो टोली बनेको छ ।

समूह बी मा नेपाल पुलिस क्लब २ खेलमा ४ अंकका साथ शीर्ष स्थानमा छ । लुम्बनी २ खेलमा १ मा जित र १ मा अंक बाड्दै ३ अंक जोड्दै दोस्रो स्थानमा छ । प्रदेश १ ले २ खेलमा १ अंकका साथ तेस्रो र कर्णाली २ खेलमा अंक विहीन हुँदै पुछारमा छ ।