पोखरा (हाम्रो खेलकुद) – नेपाल पुलिस क्लबले नवौं राष्ट्रिय खेलकुद अन्तर्गत महिला क्रिकेट प्रतियोगितामा लुम्बिनी प्रदेशलाई ९७ रनको फराकिलो अन्तरले हराउँदै सेमिफाइनलमा पुगेको छ । पुलिस लगातार तेस्रो जितका साथ सेमिफाइनलमा पुग्ने पहिलो टोली बनेको हो ।

जितको लागि १ सय १३ रनको विजयी लक्ष्य पछ्याएको लुम्बिनी १२.५ ओभरमा १५ रनमै अल आउट भयो । लुम्बिनीको लागि कप्तान सरस्वती घर्तीमगरले १३ बलमा १ चौकासहित सर्वाधिक ६ रन बनाइन् । आश्मा पुलामी मगरले ३१ बलमा एक चौकासहित ५ रन बनाइन् ।

लुम्बिनीका ७ खेलाडीले खाता नै खेल्न नसकी आउट भए । कमला घर्ती मगर, नितु भण्डारी, मधु डिसी, सुस्मिता भुषाल, सुस्मिता बजागाईं, मनिषा राना र शर्मिला रोकाले खाता खोल्न सकेनन् ।

पुलिसकी बायाँ हाते बलर ईश्वरी विष्टले ४ ओभरमा २ मेडनसहित २ रन खर्चेर ४ विकेट लिइन् । हिरनमयी राईले २ ओभरमा ५ रन खर्चेर २ विकेट लिइन् । रुविना क्षेत्री बेलबासेले १.५ ओभरमा १ रन खर्चेर २ विकेट लिए । सबनम राइले एक विकेट लिइन् ।

त्यसअघि रंगशालामा टस जितेर पहिला ब्याटिङ थालेको पुलिसले निर्धारित २० ओभरमा ७ विकेट गुमाउँदै १ सय १२ रन बनाएको थियो । पुलिसको लागि तल्लोक्रमकी कविता जोशीले २९ बलमा ७ चौका र १ छक्कासहित सर्वाधिक ४८ रनमा अविजित रहिन् ।

सिनियर टोलीका ७ सदस्य खेलाडी भएको पुलिसको सुरुवात सुस्त थियो । कविताले आक्रामक इनिङ खेलेकी थिइन् । १४ ओभरमा ४ विकेट गुमाउँदै मात्र ५० रन बनाएको थियो । त्यसपछि कविताले आक्रामक इनिङ खल्दा पुलिसले ६ ओभरमा ६२ रन बनाउँदै बलियो योगफलमा पुर्याइन् ।

पहिलो ओभरको दोस्रो बलमै ओपनर काजल श्रेष्ठलाई मनिषा रानाले कृतिका मरासिनीबाट एक रनमा क्याच आउट गराइन् । मनिषाले कप्तान रुविनालाई पाँच रनमा क्याच गराउँदै लुम्बिनीलाई राम्रो सुरुवात दिलाइन् ।

स्पिनर मधु डिसीले अप्सरी बेगमलाई १० रनमा एलबीडब्लू आउट गरिन् । १३ औं ओभरमा शोभा रोका एक रनमा आउट भइन् । स्ट्राइककी ब्याटर सम्झनासँग तालमेल गर्न नसक्दा रन आउट हुनु परेको थियो ।

कमला घर्तीमगरको फुलटस बलमा सम्झना २९ रनमा बोल्ड भइन् । उनले ३८ बल खेल्दै १ चौका हानिन् । सुस्मिता भुषालले ईश्वरी विष्टलाई एक र संगिता राईलाई शून्यमा बोल्ड गरेकी थिइन् ।

तीव्र गतिकी बलर सुस्मिता भुषालले ४ ओभरमा १२ रन खर्चेर २ विकेट लिइन् । मनिषा रानाले ४ ओभरमा १७ रन खर्चेर २ विकेट लिइन् । मधु डिसीले ४ ओभरमा १४ रन खर्चेर १ विकेट लिइन् । कमलाले २ ओभरमा २४ रन खर्चेर १ विकेट लिइन् ।

अंक तालिका

मधेश २ खेलमा ४ अंकका साथ समूह ए मा दोस्रो स्थानमा छ । नेपाल एपिएफ क्लब २ खेलमा ४ अंकका साथ नेटरनरेटको कारण शीर्ष स्थानमा छ । मधेशले शनिबार एपिएफ र आइतबार बागमतीसँग खेल्नेछ । बागमती २ खेलमा १ मा जित र १ मा हारसहित तेस्रो स्थानमा छ ।

बागमतीले अव शनिवार गण्डकी र आइतवार मधेश प्रदेशसँग खेल्नेछ । सुदूरपश्चिम ३ खेलमा १ मा जित र २ मा हारका साथ चौथो स्थानमा छ । गण्डकी भने तीनै खेलमा पराजित हुँदै प्रतियोगिताबाट बाहिरिने पहिलो टोली बनेको छ ।

समूह बी मा नेपाल पुलिस क्लब ३ खेलमा ६ अंकका साथ शीर्ष स्थानमा छ । लुम्बनी ३ खेलमा १ मा जित र १ मा हार सहित ३ अंक जोड्दै दोस्रो स्थानमा छ । प्रदेश १ ले २ खेलमा १ अंकका साथ तेस्रो र कर्णाली २ खेलमा अंक विहीन हुँदै पुछारमा छ ।

आज दोस्रो खेलमा प्रदेश १ र कर्णालीबीच प्रतिस्स्पर्धा हुनेछ । प्रदेश १ ले विशाल जित निकाले ३ अंकका साथ दोस्रो स्थानमा रहँदै नेटरनरेटको कारण सेमिफाइनलमा पुग्न सक्छ । सामान्य जितले भने लुम्बिनी सेमिफाइनलमा पुग्नेछ ।