पोखरा (हाम्रो खेलकुद) – सर्वाधिक अनुभवी खेलाडी ऋतु कनौजियाको अलराउन्ड प्रदर्शनमा सुदूरपश्चिम प्रदेशले नवौं राष्ट्रिय खेलकुद अन्तर्गत क्रिकेट प्रतियोगितामा नेपाल एपिएफ क्लबलाई ९३ रनको प्रतिस्पर्धात्मक लक्ष्य दिएको छ ।

पोखरा रंगशालामा टस जितेर पहिला ब्याटिङ थालेको सुदूरपश्चिमले निर्धारित २० ओभरमा ३ विकेट गुमाउँदै ९२ रन बनायो । सुदूरको लागि ऋतुले ४६ बलमा २ चौकासहित सर्वाधिक ३५ रनमा अविजित रहिन् ।

ओपनर विन्दु रावल १८ बल खेल्दै ८ रनमा बाल्ड भइन् । उनी स्पिनर नेरी थापाको बलमा बोल्ड भइन् । दोस्रो विकेटका लागि रवि पोद्धार र ऋतुले २९ रनको साझेदारी गरेका थिए । मध्य गतिकी बलर सुष्मा श्रेष्ठको बलमा बोल्ड हुनुअघि उनले ३५ बलमा ३ चौकासहित २३ रन बनाइन् ।

स्नेहा महरा २० बलमा १ चौकासहित १८ रनमा इन्दु बर्माको बलमा बोल्ड भइन् । तेस्रो विकेटका लागि महरा र ऋतुले सर्वाधिक ४१ रनको साझेदारी गरेकी थिइन् । डली भट्ट एक रनमा अविजित रहिन् । एपिएफकी नेरी थापा, इन्दु बर्मा र सुष्मा श्रेष्ठले एक एक विकेट लिइन् ।

समूह ए बाट एपिएफ सेमिफाइनलमा पुगि सकेको छ । समूह बी बाट नेपाल पुलिस क्लब विजेता र लुम्बिनी प्रदेश उप–विजेता हुँदै सेमिफाइनलमा पुगेका छन् । आजको दोस्रो खेलमा बागमती प्रदेश र मधेश प्रदेशबीच प्रतिस्पर्धा हुँदैछ । जसको विजेता समिफाइनलमा पुग्नेछ ।