काठमाडौं (हाम्रो खेलकुद) – बागमती प्रदेशका कप्तान ज्ञानेन्द्र मल्लले प्रधानमन्त्री कप एकदिवसिय प्रतियोगिता अन्तर्गत बागमती प्रदेश छनोटमा सानदार शतक हानेका छन् ।

ज्ञानेन्द्रले काठमाडौं जिल्लाको कप्तानी गर्दै भक्तपुरलाई ५४ रनले हराउनेक्रममा शतक हानेका हुन् । मुलपानी क्रिकेट मैदानमा टस जितेर पहिला ब्याटिङ थालेको काठमाडौंले निर्धारित ४० ओभरमा ५ विकेट गुमाउँदै २ सय २८ रन बनायो । काठमाडौंका ज्ञानेन्द्र मल्लले ९८ बलमा ६ चौका र ६ छक्कासहित १ सय १३ रनको सानदार शतकीय इनिङ खेले ।

ओपनर ईशान पाण्डे ८३ बलमा ४ चौका र १ छक्कासहित ५३ रनको योगदान दिए । रित गौतम १३, विपिन जोशी २, उत्तम थापा २७ र प्रतिश जि.सी.ले २ रन बनाए । भक्तपुरका रमाशिष महतोले तीन र विनित दासले दुई विकेट लिए ।

जितको लागि २ सय २९ रनको विजयी लक्ष्य पछ्याएको भक्तपुरले निर्धारित ४० ओभरमा ९ विकेट गुमाउँदै १ सय ७४ रन बनायो । भक्तपुरका सौरभ सहकर्मीले ८८ बलमा ५ चौका र १ छक्कासहित सर्वाधिक ६० रन बनाए । काठमाडौंका अरियो पौडेल र दीपक महतोले तीन तीन विकेट लिए । प्रतिश जि.सीले एक विकेट लिए ।

दोस्रो खेलमा ललितपुरले नुवाकोटलाई १ सय १८ रनले हरायो । निर्धारित ४० ओभरमा ललितपुरले ४ विकेट गुमाउँदै २ सय ९ रन बनायो । ललितपुरका दुर्गेश थापाले सर्वाधिक ९० रनको योगदान दिए । विवेक रानामगर ५५ र आदिल खानले २४ रनको योगदान दिए । नुवाकोटका अभिराज यादवले दुई, अशोक पौडेल र दीपेश कुमारले एक एक विकेट लिए ।

जितको लागि २ सय १० रनको विजयी लक्ष्य पछ्याएको नुवाकोट २५.५ ओभरमा ९१ रनमा अल आउट भयो । नुवाकोटका योगेश भट्टले सर्वाधिक ४१ रन बनाए । अशोक पौडेल १४ र रोशन विकले ४ रन बनाए । ललितपुरका तिलक भण्डारीले तीन, योनेश थापा र हरिओम जोशीले दुई दुई विकेट लिए ।

प्रतियोगितामा समूह ए मा ललितपुर, काठमाडौं, नुवाकोट र भक्तपुर छन् । समूह बी मा चितवन, मकवानपुर र त्रिभुवन युनिभर्सिटी छन् । प्रधानमन्त्री कप भने कार्तिक १२ देखि सुरुहुनेछ ।