पोखरा (हाम्रो खेलकुद) – राष्ट्रिय खेलकुद परिषद् (राखेप) अन्तर्गत क्रिकेटतर्फका मुख्य प्रशिक्षक जगत टमाटाले उमेर हदबन्दीको कारण अनिवार्य अवकाश पाएका हुन् । ५८ वर्षीय टमाटा पछिल्लो एक दशक देखि राखेपमा क्रिकेटतर्फ मुख्य प्रशिक्षक थिए । राखेप अन्तर्गत क्रिकेटमा प्रशिक्षकको रुपमा उनले काम गर्न २८ वर्ष बिताए ।

आइतबार पोखरा रंगशालामा एक कार्यक्रम मार्फत अवकाश लिएका हुन् । नवौं राष्ट्रिय खेलकुद अन्तर्गत महिलातर्फ क्रिकेट प्रतियोगितामा मधेश प्रदेश र बागमती प्रदेशबीचको खेलपछि उनको विदाई गरिएको थियो । विदाई कार्यक्रममा , बागमती, मधेश र पुलिस, अम्पायर, प्रशिक्षक र अम्पायरहरुको उपस्थीति थियो ।

नेपाललाई दुई पटक यू-१९ विश्वकप र २०१८ मा एकदिवसिय मान्यता दिलाएका मुख्य प्रशिक्षक टमाटाले ३० वर्षीय करिअर राखेपबाट विदा लिएका हुन् । टमाटाले सन् १९७६ सालदेखि क्रिकेट खेल्न सुरु गरेका थिए । नेपालले पहिलो पटक १९९६ मा अन्तर्राष्ट्रिय प्रतियोगितामा डेब्यू गर्दा टमाटा टोलीका सदस्य थिए । त्यो भन्दा पहिला भने उनले हक्की खेलेका थिए ।

‘मेरो एउटा लामो यात्रा छ । यसको फिल्म र बुकनै बन्ला । मेरो नाम क्रिकेटले दिएको हो’, टमाटाले भने । त्यसैमा थपे, ‘सबैभन्दा महत्वपूर्ण भनेको नै ग्रास रुट हो । माथिल्लो स्तर खेलेको सिमित हो । माथिबाट पैसादेखि सबै आउछ । तर ग्रास रुटमा काम गरेनौं भने विकास हुँदैन । हामी पछि गएर सक्दैनौं ।’

टमाटा क्यानतर्फ नेपाली महिला क्रिकेट टोलीको भने मुख्य प्रशिक्षक हुन् । मुख्य प्रशिक्षकलाई भने निरन्तरता दिनेछन् । आगमी दिनमा उनले क्यान नेतृत्वमा आउने पनि इच्छा बताए ।