पोखरा (हाम्रो खेलकुद) – नवौं राष्ट्रिय खेलकुद अन्तर्गत महिला क्रिकेट प्रतियोगिताको स्वर्णको लागि नेपाल पुलिस क्लब र नेपाल एपिएफ क्लबीच प्रतिस्पर्धा हुने भएको छ ।

सोमबार एपिएफले पहिलो सेमिफाइनल खेलमा लुम्बिनी प्रदेशलाई ६७ रनले हराउँदै फाइनलमा स्थान पक्का गर्यो । त्यस्तै डेब्यू प्रतियोगिता खेलेको पुलिसले पहिलो सहभागीतामै दोस्रो सेमिफाइनलमा बागमती प्रदेशलाई ३६ रनले हराउँदै फाइनलमा एपिएफसँगको भेट पक्का गर्यो ।

स्वर्णको लागि मंगलबार फाइनलमा पोखरा रंगशालामा पुलिस र एपिएफबीच प्रतिस्पर्धा हुनेछ । पुलिस पहिलो प्रतियोगितामै स्वर्ण जित्न चाहन्छ । एपिएफ आफ्नो एकछत्र राजलाई निरन्तरता दिने सोचमा हुनेछ । तेस्रो स्थानको लागि बागमती प्रदेश र लुम्बिनी प्रदेशबीच प्रतिस्पर्धा हुनेछ ।

सिनियर खेलाडीको बाहुल्यता भएको एपिएफ र पुलिस दुबै अपराजित हुँदै फाइनलमा पुगेका हुन् । एपिएफ समूह ए को विजेता हो । समूह चरणमा एपिएफले बागमती प्रदेशलाई ४ विकेट, गण्डकीलाई ९ विकेट, मधेश प्रदेशलाई २७ रन र सुदूरपश्चिमलाई ५ विकेटले हराएको थियो ।

त्यस्तै पुलिसले कर्णालीलाई डकवर्थ लेविस पद्धतिको आधारमा ६३ रन, प्रदेश १ लाई १ सय १८ रन र लुम्बिनी प्रदेशलाई ९७ रनले हराएको थियो । पुलिसको रुविना क्षेत्री र एपिएफको सीता रानामगरले कप्तानी गर्नेछिन् ।

एपिएफमा सीता, इन्दु बर्मा, नेरी थापा, ममता चौधरी, रोमा थापा र रेखा रावल लगायता खेलाडी छन् । नेरी थापाले यस प्रतियोगितामा सानदार प्रदर्शन गरेकी छिन् ।

पुलिसमा रुविनासँगै काजल श्रेष्ठ, सबनम राई, हिरनमयी राय, अप्सरी बेगम, कविता जोशी, कविता कुँवर जस्ता खेलाडी छन् । यस प्रतियोगितामा ईश्वरी विष्ट र सम्झन खड्काले राम्रो प्रदर्शन गरेकी छिन् ।